ЦВК: Прэзідэнцкія выбары павінны адбыцца не пазней за 20 ліпеня 2025 года
Старшыня ЦВК Ігар Карпенка
24 лістапада, Позірк. Чарговыя прэзідэнцкія выбары ў Беларусь павінны адбыцца “не пазней за 20 ліпеня 2025 года”, цытуюць дзяржаўныя СМІ старшыню Цэнтрвыбаркама Ігара Карпенку.
Кіраўнік ЦВК паведаміў пра гэта 24 лістапада на сустрэчы з прадстаўнікамі “палітычных партый і іншых грамадскіх аб’яднанняў”.
Карпенка назваў выбары 2025 года часткай “завяршальнага этапу маштабнай мадэрнізацыі палітычнай сістэмы”, якая праводзіцца “ў адпаведнасці са змяненнем канстытуцыйных норм, прынятых на рэспубліканскім рэферэндуме 27 лютага 2022 года”. Іншымі складнікамі гэтага этапа, паводле яго слоў, з’яўляюцца “фармаванне дэпутацкага корпуса ў адзіны дзень галасавання і выбары дэлегатаў Усебеларускага народнага сходу”.
20 лістапада Аляксандр Лукашэнка падпісаў указы, у адпаведнасці з якімі выбары ў Палату прадстаўнікоў Нацыянальнага сходу восьмага склікання і мясцовыя саветы дэпутатаў 29-га склікання пройдуць у адзіны дзень галасавання 25 лютага 2024 года, у Савет Рэспублікі Нацыянальнага сходу восьмага склікання — 4 красавіка 2024-га.
Папярэднія прэзідэнцкія выбары ў 2020 годзе выклікалі самыя масавыя ў гісторыі Беларусі пратэсты — спачатку супраць фальсіфікацыі вынікаў галасавання, затым супраць гвалту з боку сілавікоў у дачыненні да дэманстрантаў. Пратэсты, актыўная фаза якіх цягнулася да канца таго года, у выніку былі задушаныя, а ў краіне пачаліся маштабныя рэпрэсіі, якія працягваюцца дагэтуль.
На хвалі рэпрэсій улады ліквідавалі практычна ўсе незалежныя структуры грамадзянскай супольнасці. Было цалкам перафарматаванае партыйнае поле Беларусі.
Улетку і ўвосень у Беларусі былі скасаваныя 11 палітычных рухаў (апазіцыйных, лаяльных, неактыўных) — Кансерватыўна-хрысціянская партыя — БНФ, Беларуская патрыятычная партыя, Беларуская партыя “Зялёныя”, партыя “Беларуская сацыял-дэмакратычная Грамада”, Рэспубліканская партыя, Сацыял-дэмакратычная партыя народнай згоды, Партыя БНФ, Аб’яднаная грамадзянская партыя, Беларуская сацыяльна-спартыўная партыя, Беларуская сацыял-дэмакратычная партыя “Грамада”, партыя “Справядлівы свет”.
На пачатку верасня стала вядома, што Беларуская аграрная партыя знаходзіцца ў працэсе самаліквідацыі, у спісе зарэгістраваных палітычных сіл яе няма.
Прайшоўшы перарэгістрацыю, працягваюць дзейнічаць праўладныя Камуністычная партыя Беларусі, Ліберальна-дэмакратычная партыя, Рэспубліканская партыя працы і справядлівасці. Акрамя таго, зарэгістраваная максімальна лаяльная Лукашэнку партыя “Белая Русь”.