Лукашэнка — новапрызначаным чыноўнікам: Вызначайце патрыётаў і падтрымлівайце іх на выбарах у парламент і УНС

25 верасня, Позірк. Беларусь чакаюць “буйныя электаральныя кампаніі”, таму “ідэалагічны складнік мае першараднае значэнне”, заявіў Аляксандр Лукашэнка 25 верасня падчас прызначэння новых чыноўнікаў узроўню міністэрстваў і мясцовых уладаў.

“Працуйце, думайце, хто будзе прадстаўляць вас у парламенце, Усебеларускім народным сходзе, — цытуе Лукашэнку яго прэс-служба. — Мы абсалютна не хаваем тое, што мы некага будзем падтрымліваць. Гэта натуральна. Калі б мы зараз, ведаеце, такімі цнатлівымі сябе прадстаўлялі, з нас бы проста смяяліся”.

Паводле яго слоў, “катэгарычна нельга” праводзіць выбары так, як “нас увесь час амерыканцы вучылі”: “Уратуй нас Бог так праводзіць яе (электаральную кампанію. — “Позірк“.) па пошце асабліва. І калі б мы так праводзілі, нас бы — цяпер не, а раней — з твару зямлі сцерлі”.

Таму, на думку Лукашэнкі, “нічога і нікога хаваць не трэба”. “Гэта павінны быць прафесіяналы, годныя людзі. Каб людзі, даведаўшыся пра кандыдатаў, якіх мы падтрымліваем, не кідалі нам у твар усякія гадасці. Разумных, таленавітых людзей у нас дастаткова”, — заявіў ён.

На сустрэчы са старшынёй Палаты прадстаўнікоў Уладзімірам Андрэйчанкам 12 верасня ў Мінску Лукашэнка заявіў, што мае намер “пазней вернуцца” да пытання “эфектыўнасці працы Нацыянальнага сходу”, каб “сфармаваць нармальны склад будучага парламента”.

“Так, народ будзе вызначаць, народ будзе абіраць, але народ трэба праінфармаваць. Трэба расказаць падрабязна, дэталёва пра сітуацыю. І пра тое, як працаваў парламент. Ды і нагадаць людзям пра функцыі парламента. Таму што так ужо склалася з савецкіх часоў, што людзі прывыклі, што дэпутаты павінны і дах адрамантаваць, і агароджу паправіць. Мы даўно ўжо ад гэтага адышлі, у нас невялікі парламент паводле колькасці. І ён займаецца заканатворчасцю. Гэта галоўная яго праца”, — падкрэсліў ён.

У 2024 годзе ўпершыню ў Беларусі пройдуць аб’яднаныя выбары ў Палату прадстаўнікоў і мясцовыя саветы. Адзіны дзень галасавання прызначаны на 25 лютага. На працягу 60 дзён пасля яго адбудзецца першае паседжанне Ўсебеларускага народнага сходу ў новым статусе.

Падчас выбараў будзе забаронена фатаграфаваць і выкладваць у інтэрнэт запоўнены бланк бюлетэня — як падчас датэрміновага галасавання, так і ў дзень выбараў. За парушэнне гэтага патрабавання пагражае адміністрацыйная адказнасць.

З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.

Гл. таксама:

Крэмль паспрабуе прасунуць сваіх прыхільнікаў на выбарах-2024 у Беларусі, каб пасля адхіліць Лукашэнку — Латушка

Апанентам рэжыму цяжка прыдумаць моцную контргульню ў рамках электаральных кампаній 2024–2025 гадоў (на рускай мове)