Указ, які абмяжоўвае паўнамоцтвы замежных устаноў адносна пашпартоў грамадзян, набудзе моц 7 верасня

6 верасня, Позірк. Указ № 278 ад 4 верасня “Аб парадку выдачы дакументаў і здзяйснення дзеянняў” апублікаваны 6 верасня на Нацыянальным прававым інтэрнет-партале.

У ім пазначана, што ён уступае ў сілу пасля афіцыйнага апублікавання.

Згодна з заканадаўствам, калі акт уступае ў сілу пасля яго афіцыйнага апублікавання, то плынь тэрміну ўступлення ў сілу пачынаецца з нуля гадзін дня, наступнага за днём публікацыі.

Як паведамлялася, указам скасавана магчымасць замежных устаноў Беларусі аднаразова падаўжаць тэрмін дзеяння пашпарта беларускага грамадзяніна.

У адпаведнасці з ім, выдаваць і абменьваць пашпарт грамадзяніну, які пражывае за межамі Беларусі і знаходзіцца на консульскім уліку, зараз будзе “орган унутраных спраў па месцы апошняй рэгістрацыі па месцы жыхарства”.

У кампетэнцыі Міністэрства замежных спраў застанецца выдача і абмен пашпарта тым, хто аформіў дакументы на пражыванне па-за межамі Беларусі, але яшчэ застаецца на тэрыторыі дзяржавы.

Пры гэтым захавана магчымасць падаваць у замежныя ўстановы дакументы для афармлення пастаяннага пражывання за межамі Беларусі. Для гэтага грамадзянін сярод іншага павінен падаць у пасольства або консульства пашпарт або ідэнтыфікацыйную карту і біяметрычны пашпарт (акрамя выпадкаў, калі пашпарт страчаны або грамадзянства можа быць пацверджана без яго).

Акрамя таго, гэты ўказ абмежаваў паўнамоцтвы замежных устаноў па здзяйсненні натарыяльных дзеянняў, у тым ліку ў дачыненні да нерухомасці.

Скасоўваецца права консульстваў удзельнічаць у працэдуры адчужэння маёмасці, уключаючы нерухомасць і аўтамабілі. Такія здзелкі можна будзе здзяйсняць пры асабістай яўцы ў адпаведныя дзяржорганы або на падставе даверанасці, аформленай на тэрыторыі Беларусі (раней такія даверанасці афармляліся ў дыппрадстаўніцтвах).

Паводле аналагічнага прынцыпу, у адпаведнасці з указам, магчымы атрыманне дублікатаў дакументаў аб адукацыі, даведак і паўторных пасведчанняў з ЗАГС, афармленне апастыляў і іншых дакументаў, ажыццяўленне дзяржаўнай рэгістрацыі транспартных сродкаў і зняцце іх з уліку, рэгістрацыя грамадзян па месцы жыхарства (знаходжання).

За консульствамі захавана права сведчыць завяшчанні, згоды і адмовы, факты знаходжання грамадзяніна ў жывых ці ў вызначаным месцы, сведчыць аб вернасці копій і перакладаў дакументаў.

Прыняцце дакумента, які дэ факта абмяжоўвае правы беларусаў, якія пражываюць за мяжой, раскрытыкавалі дэмакратычныя сілы.

На думку намесніка кіраўніка Аб’яднанага пераходнага кабінета, кіраўніка Народнага антыкрызіснага ўпраўлення Паўла Латушкі, пазбаўленне беларусаў права падаўжаць дзеянне пашпарта ў дыпламатычных прадстаўніцтвах за мяжой створыць праблемы для краін Еўрасаюза.

“Мы рыхтуем да запуску выдачу новых пашпартоў Беларусі і працуем над іх прызнаннем. Гэта працэс не хуткі, і тут нам патрэбна будзе дапамога ўсіх беларусаў, якія жывуць за мяжой. Нам неабходна будзе заручыцца падтрымкай урадаў краін, дзе пражываюць беларусы. Мы спадзяемся, што пашпарт зможа вырашыць шэраг праблем з легалізацыяй”, — заявіла дэмлідар Святлана Ціханоўская.

Праект “пашпарта новай Беларусі” дэмсілы пачалі рыхтаваць у 2023 годзе.