Намеснік кіраўніка адміністрацыі Лукашэнкі Ермаловіч і старшыня Дзяржстандарта Татарыцкі атрымалі міністэрскія пасады ў ЕЭК

27 снежня, Позірк. Два беларускія чыноўнікі зацверджаныя ў якасці членаў калегіі Еўразійскай эканамічнай камісіі (ЕЭК), абноўлены пералік якіх апублікавала прэс-служба ЕЭК.

Міністрам па канкурэнцыі і антыманапольным рэгуляванні ЕЭК стаў Максім Ермаловіч, які зараз займае пасаду намесніка кіраўніка адміністрацыі Аляксандра Лукашэнкі.

Пасаду міністра па тэхнічным рэгуляванні ЕЭК заняў Валянцін Татарыцкі — старшыня Дзяржаўнага камітэта па стандартызацыі.

Абноўлены склад калегіі пачне працаваць 1 лютага 2024 года. У гэты ж дзень паўнамоцтвы старшыні калегіі ЕЭК пяройдуць да прадстаўніка Казахстана Бакытжана Сагінтаева, які зменіць на гэтай пасадзе беларускага функцыянера Міхаіла Мясніковіча.

Ермаловіч з 1999 года працаваў у Міністэрстве фінансаў, дзе прайшоў шлях ад кансультанта ўпраўлення аналізу і планавання даходаў бюджэту да міністра. Улетку 2020 года быў прызначаны амбасадарам у Вялікабрытаніі і Ірландыі (па сумяшчальніцтве), праз два гады быў адкліканы і прызначаны намеснікам кіраўніка адміністрацыі Лукашэнкі.

Татарыцкі ў 1986–1999 працаваў на інжынерных пасадах, пасля быў у кіраўніцтве прадпрыемства “Рудзенск”. У 2015 годзе стаў першым намеснікам старшыні Дзяржстандарта, у 2019 годзе — кіраўніком гэтага ведамства.

ЕЭК — пастаянна дзейны орган рэгулявання ў Еўразійскім эканамічным саюзе (ЕАЭС), адказны за забеспячэнне ўмоў функцыянавання і развіцця ЕАЭС, распрацоўку прапаноў па далейшым развіцці інтэграцыі.