Улады Польшчы маюць намер стварыць міжведамасную групу па рашэнні звязаных з Беларуссю пытанняў

9 студзеня, Позірк. Дамоўленасць пра стварэнне міжведамаснай рабочай групы па вырашэнні звязаных з Беларуссю пытанняў была дасягнутая на сустрэчы дэлегацыі Аб’яднанага пераходнага кабінета (АПК) на чале са Святланай Ціханоўскай з міністрам замежных спраў Польшчы Радославам Сікорскім 8 студзеня ў Варшаве.

Паводле інфармацыі тэлеграм-канала беларускага палітыка, у гэтую групу павінны ўвайсці прадстаўнікі розных польскіх міністэрстваў і дзяржаўных устаноў.

Ціханоўская заклікала суразмоўцу працягваць выдаваць беларусам “як звычайныя, так і гуманітарныя” візы. Яна звярнула ўвагу на “важнасць захавання мабільнасці беларусаў” і прапанавала “выдаваць візы не толькі ў Беларусі, але і ў польскіх консульствах у іншых краінах”. У прыватнасці гаворка зайшла пра Грузію, “дзе беларусы не могуць атрымаць ніякіх дакументаў”.

Кіраўнік АПК папрасіла Сікорскага падтрымаць сумленны беларускі бізнес у Польшчы, у тым ліку падоўжыць праграму Poland Business Harbour, якая “дазваляе ствараць умовы для працы беларускіх кампаній”. Акрамя таго, яна заклікала працягнуць аказваць дапамогу “незалежным беларускім медыя, якія працуюць у Польшчы і адыгрываюць важную ролю ў супрацьдзеянні прапагандзе”.

Міністра па еўрапейскіх справах Адама Шлапку дэмлідар папрасіла “падтрымаць еўрапейскі выбар беларусаў і зрабіць Беларусь адным з прыярытэтаў падчас старшынства” Польшчы ў Савеце ЕС у 2025 годзе.