19 студзеня, Позірк. У Беларусі рыхтаваліся “выбухі на прадпрыемствах нафтаперапрацоўчай галіны”, а таксама “падрыхтоўка забойстваў дзяржаўных дзеячаў і журналістаў”, заявіў у фільме тэлеканала “Беларусь 1” намеснік начальніка следчага ўпраўлення Камітэта дзяржаўнай бяспекі Канстанцін Бычак.
У фільме паказаныя кадры допыту Вячаслава Барадзія, якога КДБ называе агентам Службы бяспекі Украіны (СБУ) з пазыўным “Мангуст”, а таксама нібыта агента спецслужбы Сяргея Неўмяржыцкага (“Шмэра”). Сцвярджаецца, што яны “прайшлі падрыхтоўку ў навучальных цэнтрах украінскіх спецслужбаў”, а затым даставілі ў Беларусь “агнястрэльную зброю, выбуховыя прылады, ударныя і выведвальныя БПЛА”. Таксама яны “прыцягвалі да супрацоўніцтва беларускіх грамадзян”, якія “па іх даручэнні абсталявалі месцы для захоўвання вышэйпералічаных прадметаў”.
Заяўляецца, што “ў дзеяннях фігурантаў ёсць прыкметы такіх злачынстваў, як здрада дзяржаве, агентурная дзейнасць і акт тэрарызму”.
Выпушчаны тэлеканалам фільм з’яўляецца працягам інфармацыі, распаўсюджанай дзяржСМІ з дапамогай КДБ 11 верасня 2023 года.
Тады паведамлялася, што пачынаючы з 26 жніўня, КДБ “спыніў дзейнасць трох агентурных груп, баявых ячэек Службы бяспекі Украіны, створаных для дыверсій, тэрактаў у Беларусі і Расіі”. Адным з затрыманых называўся Барадзій з пазыўным “Мануст”, затрыманы каля вёскі Скарадное ў Ельскім раёне (Гомельская вобласць).
Старшыня КДБ Іван Церцель 17 снежня заявіў, што СБУ “вядзе актыўныя дзеянні на тэрыторыі Беларусі”.
“Вы ведаеце пра выпадак выяўлення спробаў тэрактаў на чыгунцы, у Мачулішчах затрыманы і кінуты (мабыць, на волю лёсу. — “Позірк“.) іх агент — тэрарыст, хутка пачнецца судовы працэс. На наступным тыдні мы прадэманструем яшчэ факты, звязаныя з затрыманнем баевікоў, якія накіроўваліся сюды. Супрацоўнікі спецслужбаў цынічна іх інструктавалі: калі ты ў лесе сустрэнеш дзіця ці жонку — застрэль іх”, — заявіў Церцель.
Гл. таксама:
Грамадзянка Беларусі затрыманая ў Польшчы па падазрэнні ў працы на КДБ
