Лукашэнка заявіў, што Беларусь атрымала “Іскандэры” “за грошы расіян”

19 студзеня, Позірк. Аператыўна-тактычныя ракетныя комплексы (АТРК) “Іскандэр” Беларусь атрымала “за грошы расіян”, заявіў Аляксандр Лукашэнка 19 студзеня падчас рабочай паездкі ў Барысаўскі раён (Мінская вобласць) і наведвання СЗАТ “БЕЛДЖЫ”

“Праўда, мы плацім ім па іншых рахунках”, — цытуе Лукашэнку яго прэс-служба.

Ён паведаміў, што падпісаў указ аб прымяненні “Іскандэраў” “толькі са згоды прэзідэнта, згоды міністра абароны, начальнік генеральнага штаба задзейнічаны, у кожнага свае функцыі” (паводле відэафрагменту, апублікаванага ў тэлеграм-канале “Пул первого”).

Адзначыўшы, што “Іскандэры” з’яўляюцца “асабліва небяспечнай зброяй”, Лукашэнка сказаў: “Ядзерная зброя яшчэ больш складаная ва ўжыванні. Мы атрымалі шмат боепрыпасаў. Ракет перш за ўсё. Ядзерная зброя ўсіх паставіла на месца. Як толькі ў Беларусі з’явілася ядзерная зброя — усе крылы апусцілі. І суседзі, ашалелыя нашы, і іншыя. Хоць не дай бог не толькі мне, але і новаму пакаленню палітыкаў думаць аб ужыванні гэтай ядзернай зброі. Гэта страшная зброя”.

1 лютага 2023 года Мінабароны паведаміла, што беларускія вайскоўцы прыступілі да поўнай самастойнай эксплуатацыі АТРК “Іскандэр”.

“Іскандэр” — гэта расійскае сямейства АТРК. Яго асноўнае прызначэнне — знішчэнне сістэм СПА і ПРА верагоднага суперніка, а таксама важных аб’ектаў (масты, склады, камандныя пункты і вузлы сувязі, самалёты і верталёты на аэрадромах, аб’екты інфраструктуры, зборы войскаў і тэхнікі, іншыя АТРК, дывізійную артылерыю, караблі).

Комплексы могуць выкарыстоўваць як крылатыя, так і квазі-балістычныя ракеты.

З ракет сямейства далёкасць дзеяння ад 300 да 500 км мае мадыфікацыя “Іскандэр-М”, якая знаходзіцца на ўзбраенні ВС РФ.

У 2024 годзе беларускія вайскоўцы правядуць баявыя пускі комплексу “Іскандэр”, паведамляла Мінабароны.

Аляксандр Лукашэнка заявіў аб тым, што Беларусь паставіла на баявое дзяжурства перададзеныя Расіяй зенітныя ракетныя комплексы С-400 і “Іскандэр”, па выніках перагавораў з Уладзімірам Пуціным 19 снежня 2022 года ў Мінску.

Аператыўна-тактычныя ракетныя комплексы “Іскандэр” з’яўляюцца патэнцыйнымі носьбітамі ядзернай зброі.

Перад паседжаннем Вышэйшай Еўразійскай эканамічнай рады 25 снежня мінулага года ў Санкт-Пецярбургу Аляксандр Лукашэнка заявіў журналістам, што тактычная ядзерная зброя даўно дастаўлена з РФ у Беларусь, “апошняя пастаўка” адбылася ў пачатку кастрычніка. “Усё на сваіх месцах, у добрым стане”, — сцвярджае ён.