Дубавец: У Беларусі цяпер няма дыскусій, таму і з’яўляюцца крымінальныя справы

23 студзеня, Позірк. У Беларусі цяпер “няма дыскусій”, таму “з’яўляюцца справы”, такім чынам журналіст “Радыё Свабода” Сяргей Дубавец пракаментаваў “Позiрку” тое, што Генеральная пракуратура ініцыявала яго крымінальны пераслед.

“Гэта звязана з публікацыямі, якія я раблю ў тэлеграм-канале “Радыё Свабода”, дзе выказваю на аснове аб’ектыўнай інфармацыі свае думкі пра гісторыю, культуру, беларускую мову і цяперашні беларускі рэжым. Нічым іншым я не займаюся”, — падкрэсліў суразмоўца.

Паводле яго слоў, меркаванні, якія ім выказваюцца, “могуць па вялікім рахунку выклікаць толькі дыскусіі, а не ўзбуджэнне крымінальнай справы”.

“Сённяшняя ўлада не здольная дыскутаваць, яе дзеянні скіраваныя выключна на ўстаноўкі і рэпрэсіі”, — канстатаваў Дубавец.

Ён адзначыў, што “ніяк” не адрэагаваў на навіну Генпракуратуры, паколькі “прэцэдэнты ж былі розныя: і кнігі “няправільнымі” прызнавалі, і мёртвых судзілі”.

Журналіст падкрэсліў, што ў святле крымінальнага пераследу яго дзейнасць не зменіцца: “Я ўсё жыццё займаюся тым, што разважаю пра розныя праявы жыцця, гэтым і працягну займацца”.

23 студзеня Генпракуратура заявіла пра ўзбуджэнне ў дачыненні да Дубаўца крымінальных спраў паводле арт. 369¹, ч. 1 арт. 130, ч. 1 арт. 367, ч. 1 арт. 361¹, ч. 1 арт. 130², ч. 1 арт. 130¹.

Для арганізацыі папярэдняга расследавання справа накіравана ў Следчы камітэт.

Даведка “Позірку”:

• ч. 1 арт. 130 — наўмысныя дзеянні, скіраваныя на ўзбуджэнне расавай, нацыянальнай, рэлігійнай або іншай сацыяльнай варожасці або варажнечы паводле прыкметы расавай, нацыянальнай, рэлігійнай, моўнай ці іншай сацыяльнай прыналежнасці;
• ч. 1 арт. 130¹ — наўмысныя дзеянні па рэабілітацыі нацызму;
• ч. 1 арт. 130² — адмаўленне генацыду беларускага народа, якое ўтрымліваецца ў публічным выступе, або ў друкаваным або публічна дэманстраваным творы, або ў СМІ, або ў інфармацыі, размешчанай у <…> інтэрнэце;
• ч. 1 арт. 361¹ — стварэнне экстрэмісцкага фарміравання, а таксама фарміравання, дзейнасць якога скіраваная на рэабілітацыю нацызму, або кіраўніцтва такім фарміраваннем або структурным падраздзяленнем, якое ўваходзіць у яго;
• ч. 1 арт. 367 — паклёп у дачыненні да прэзідэнта Рэспублікі Беларусь, які ўтрымліваецца ў публічным выступе, або ў друкаваным або публічна дэманстраваным творы, або ў СМІ, або ў інфармацыі, размешчанай у <…> інтэрнэце;
• ст. 369¹ — распаўсюд заведама ілжывых звестак пра палітычнае, эканамічнае, сацыяльнае, ваеннае або міжнароднае становішча Рэспублікі Беларусь, прававое становішча грамадзян, дзейнасць дзяржаўных органаў, Узброеных сіл, іншых войскаў і воінскіх фарміраванняў, ваенізаваных арганізацый, якія дыскрэдытуюць Рэспубліку Беларусь, здзейснены ў публічным выступе, або у друкаваным ці публічна дэманстраваным творы, альбо ў СМІ, альбо ў інфармацыі, размешчанай у <…> інтэрнэце, скіраваны на прычыненне істотнай шкоды дзяржаўным ці грамадскім інтарэсам.

Грамадства Палітыка

Грамадства, Палітыка

Генпракуратура адкрыла крымінальныя справы ў дачыненні да журналіста РС Сяргея Дубаўца

23 студзеня, Позірк. Генеральная пракуратура ўзбудзіла крымінальныя справы ў дачыненні да блогера і журналіста “Радыё Свабода” Сяргея Дубаўца, паведамляе прэс-служба ведамства. Яму інкрымінавана "парушэнне заканадаўства аб супрацьдзеянні экстрэмізму, недапушчэнні рэабілітацыі нацызму і адмаўленні генацыду беларускага народа". “Згодна з матэрыяламі спраў падазраваны ў …

Чытаць