На фоне незадаволенасці беларусаў чэргамі новы кіраўнік Мінздароўя выправіўся правяраць паліклінікі
Чарга ў жодзінскай паліклініцы (ілюстрацыйнае фота)
30 студзеня, Позірк. Міністэрства аховы здароўя праводзіць маніторынг сітуацыі з чэргамі ў паліклініках, паведаміла 30 студзеня прэс-служба ведамства.
“У сувязі з ростам захваральнасці на ВРВІ і грып міністр аховы здароўя Аляксандр Хаджаеў і намеснік міністра Юрый Горбіч правялі маніторынг чэргаў у паліклініках № 38, № 40 і № 2 (дзіцячай) Мінска”, — гаворыцца ў паведамленні.
Падчас наведвання гэтых медустаноў міністр “зрабіў акцэнт на арганізацыі працы ўчастковай службы, кабінетаў лабараторнай дыягностыкі”. Правяраючыя таксама “вывучылі лагістычную арганізацыю кабінетаў дыспансерызацыі”.
Хаджаеў даручыў “зменшыць працягласць знаходжання пацыента ў паліклініцы”, рэкамендаваўшы “час чакання ўрача выкарыстоўваць для правядзення лабараторных даследаванняў”. Асобна дадзены даручэнні па якасці лабараторнай працы.
Аляксандр Хаджаеў заняў пасаду міністра аховы здароўя 25 студзеня, змяніўшы Дзмітрыя Піневіча.
Згодна са данымі праведзенага ў чацвёртым квартале 2023 года даследавання Інстытута сацыялогіі Нацыянальнай акадэміі навук, 78,9% жыхароў Беларусі сутыкаюцца з працяглым чаканнем медабслугоўвання ў чэргах да ўрачоў, 33,5% — з некампетэнтнасцю медыкаў.
Сярод іншых праблем рэспандэнты звярнулі ўвагу на немагчымасць трапіць да ўрача ў дзень звароту (61,7%), нязручны графік прыёму пацыентаў (36,5%), складанасць атрымання накіравання да спецыялістаў (34,1%).
Кожны чацвёрты рэспандэнт (24,4%) быў сведкам адміністрацыйных памылак у медыцынскіх установах, а для 23,8% актуальнай праблемай з’яўляецца доўгае чаканне аперацый і дыягнастычных паслуг.
Кожны пяты (20,3%) сутыкнуўся з пастаноўкай няправільнага дыягназу і памылковым прызначэннем лекаў. 19,5% паскардзіліся на грубае стаўленне з боку ўрачоў і медперсаналу.
Летась 2 чэрвеня Лукашэнка падпісаў распараджэнне “Аб падвышэнні эфектыўнасці працы сістэмы аховы здароўя”, у якім даручана “навесці парадак ва ўстановах аховы здароўя ўсіх узроўняў” і стварыць умовы “для аказання якаснай медыцынскай дапамогі насельніцтву”, надаўшы асаблівую ўвагу сельскім жыхарам. Сфармаваная міжведамасная працоўная група пасля праверкі сістэмы аховы здароўя павінна праінфармаваць Лукашэнку пра вынікі ў студзені 2024 года.