У Беларусі цыгарэты за год падаражэлі на 63,3%

8 лютага, Позірк. На працягу 2023 года ўзровень інфляцыі “не толькі вярнуўся да мэтавай траекторыі”, але і “некалькі разоў перапісаў гістарычны мінімум”, гаворыцца ў паведамленні Міністэрства антыманапольнага рэгулявання і гандлю (МАРГ).

У прыватнасці: у траўні — 3,7%, чэрвені — 2,9%, ліпені — 2,7%, жніўні — 2,3%, верасні — 2%.

Паводле дадзеных МАРГ, у чацвёртым квартале “паскарэнне гадавой інфляцыі абумоўлена “сыходам” з разліку нізкай базы папярэдняга года, у прыватнасці — дэфляцыі на 2,1%, зафіксаванай у кастрычніку — лістападзе 2022-га”.

МАРГ канстатуе, што за 2023 год большасць тавараў і паслуг “павялічыліся ў кошце умеранымі тэмпамі”.

“Больш за ўзровень гадавой інфляцыі падаражэлі пазіцыі, кошты (тарыфы) на якія схільныя курсавых ваганняў (напрыклад, садавіна — на 19,7%, міжнародны ж/д транспарт — на 27,7%, паветраны — на 15,6%, турыстычныя паслугі — на 25,3% і інш.), гародніна (на 27,1%), айчынныя тавары мясамалочнай групы, а таксама тавары (паслугі) у сферы пастаянна рэгуляванага цэнаўтварэння”, — гаворыцца ў паведамленні.

Больш нізкай гадавой інфляцыі ў параўнанні з мэтавым параметрам, лічыць ведамства, спрыяла рэгуляванне коштаў.

Сярод пастаянна рэгуляваных цэн (тарыфаў) “апераджальнымі тэмпамі павышаны цэны” на тытунёвыя вырабы (+63,3%) і моцныя алкагольныя напоі (+16,5%), а таксама на лекі (+13,4%) і паслугі дашкольных устаноў (+11,1%), тарыфы на жыллёва-камунальныя паслугі (+8,7%) і пасажырскія перавозкі па чыгунцы рэгіянальных зносін эканом-класа (+20,8%), вышэйшай адукацыі (+14%).

Рэгулятар адзначае, што ў снежні ў дачыненні да лістапада падаражэнне плодаагародніннай прадукцыі склала 9,6%: памідоры — +17,3%, агуркі — +28,9%, буракі — +11,1%, капуста — 22,6%, бананы — +3,5%, яблыкі — +8,1%, цытрусавыя — +6,9%.

За апошнія пяць гадоў (з 2018 па 2022 гг.) цэны на плодаагароднінную прадукцыю ў снежні ў сярэднім павялічваліся на 8,4% за месяц (мінімальна на 6% у 2019-м, максімальна — на 11,2% у 2020-м).

Прырост цэн на мяса і мясапрадукты, а таксама малако і малочныя прадукты склаў па 0,6% на абедзве пазіцыі.

Паводле дадзеных МАРГ, у 2023 годзе было ўстаноўлена 795 фактаў “невыканання патрабаванняў нарматыўных прававых актаў, якія рэгулююць пытанні цэнаўтварэння”.

Меры адміністрацыйнай адказнасці і прафілактычнага характару прыменены ў дачыненні да 417 асоб, штрафы склалі 905 тыс. рублёў (у тым ліку па матэрыялах мінулых гадоў).

За студзень — снежань 2023 года спажывецкія цэны выраслі на 5,8%: харчовыя тавары сталі даражэйшымі на 6,8%, нехарчовыя — на 2,9%, паслугі — на 8,1%.

2 кастрычніка 2023 года Аляксандр Лукашэнка зацвердзіў важнейшыя прагнозныя (дэ-факта планавыя) параметры развіцця краіны на 2024 год.

Згодна з указамі № 307 і 308, прырост ВУП павінен скласці 3,8% (у 2023-м павялічыўся на 3,9% пры прагнозе 3,8%), інвестыцый у асноўны капітал — 3,9%, экспарту тавараў і паслуг — 7,6%, рэальных наяўных грашовых даходаў насельніцтва — 3,5%, рэальнага заробку — 3,9%. Намінальная сярэднямесячная зарплата павінна ўзрасці да 2.087 рублёў (у лістападзе 2023 года складала 1.975,6 рубля), у бюджэтным сектары — да 1.634, інфляцыя — не перавысіць 6% (у 2023-м дасягнула 5,84% пры прагнозе 7–8%), міжнародныя рэзервовыя актывы — быць не ніжэй за 6 млрд долараў ЗША (на 1 студзеня 2024 года складалі 8 млрд 127,4 млн).