Намеснік старшыні ВС заявіў аб гатоўнасці судоў да спроб сарваць выбары

16 лютага, Позірк. “Мы зробім усё для таго, каб з боку судовай улады было забяспечана правільнае і своечасовае вырашэнне тых пытанняў, якія ўзнікаюць падчас выбарчай кампаніі”, — заявіў на прэс-канферэнцыі ў Мінску 16 лютага намеснік старшыні Вярхоўнага суда Валерый Калінковіч.

Паводле яго слоў, Беларусь “уступае ў новы перыяд важных падзей” — падыходзіць да завяршэння падрыхтоўка да выбараў у Палату прадстаўнікоў і мясцовыя Саветы дэпутатаў, “электаральная кампанія будзе прадоўжана ў наступным годзе”, у новым прававым фармаце пачне работу Усебеларускі народны сход.

“Мы гатовы да таго, што новы перыяд у жыцці нашай краіны можа суправаджацца спробамі з боку дэструктыўных сіл працэсы ўскладніць, сарваць, зноў паставіць пад пагрозу існаванне беларускай дзяржаўнасці”, — сказаў прадстаўнік ВС.

Падводзячы вынікі працы судовай сістэмы, Калінкавіч паведаміў, што ў 2023 годзе ў вытворчасці знаходзілася больш за 35,6 тыс. крымінальных спраў. Асуджана больш за 33,7 тыс. чалавек, што на 11,6 працэнта менш, чым у 2022 годзе.

Апраўдальныя прыгаворы вынесены ў адносінах да 47 чалавек, удакладніў ён.

У гэтым годзе ўпершыню ў Беларусі пройдуць аб’яднаныя выбары ў Палату прадстаўнікоў Нацыянальнага сходу (ПП НС) і мясцовыя саветы дэпутатаў. Адзіны дзень галасавання прызначаны на 25 лютага.

На 110 месцаў у ПП НС восьмага склікання прэтэндуе 265 кандыдатаў, на 12.512 месцаў у мясцовых саветах дэпутатаў — 18.802. Сярэдні конкурс — 2,4 і 1,5 чалавека на месца адпаведна. Сярод кандыдатаў няма праціўнікаў рэжыму Аляксандра Лукашэнкі.

Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі, у гэтым актыўна ўдзельнічае судовая сістэма.

З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.

11 лютага намеснік міністра ўнутраных спраў — камандуючы ўнутранымі войскамі Мікалай Карпянкоў дапусціў удзел наймітаў расійскай прыватнай ваеннай кампаніі “Вагнер” у мерапрыемствах МУС у перыяд выбараў.

У 2025 годзе адбудуцца чарговыя прэзідэнцкія выбары.

(Выкарыстаны матэрыялы “СБ. Беларусь сегодня” і “Спутник Беларусь”).