Для кантрабанды цыгарэт беларус выкарыстаў хлеб

21 лютага, Позірк. Пра незвычайны спосаб кантрабанды цыгарэт з Беларусі паведаміла Літоўская мытня.

Тавар быў знойдзены ў пункце пропуску Райгардас (з беларускага боку Прывалка) пры праверцы асабістых рэчаў кіроўцы аўтамабіля “Фальксваген Мульцівен”.

“Падчас мытнага надгляду супрацоўнікі выявілі кантрабандныя цыгарэты ў прадуктах харчавання — боханах хлеба і скрынках з-пад кавы”, — гаворыцца ў прэс-рэлізе. Адзначаецца, што летась цыгарэты знаходзілі ў кансервах з-пад баршчу і веласіпедных пакрышках. На гэты раз у хлебе і каве было схавана 60 пачкаў цыгарэт NZ і Minsk Superslims.

Кантрабанда канфіскаваная, на беларуса складзены пратакол аб адміністрацыйным правапарушэнні.

13 лютага супрацоўнікі Нацыянальнай падатковай адміністрацыі Польшчы затрымалі ў Падляскім ваяводстве партыю кантрабандных беларускіх цыгарэт — 400 тыс. пачак. Цыгарэты перавозіў 41-гадовы грамадзянін Беларусі на грузавіку з літоўскай рэгістрацыяй. “Калі б канфіскаваныя цыгарэты былі прададзеныя [у Польшчы], дзяржаўны бюджэт страціў бы больш за 10 млн злотых (блізу 2,5 млн долараў. — “Позірк”.)”, — адзначалася ў паведамленні.