Праўладныя назіральнікі пагражаюць штрафамі за вынас бюлетэняў з выбарчых участкаў

21 лютага, Позірк. На адным з участкаў зафіксаваная спроба вынесці бюлетэні, паведаміў у сваім тэлеграм-канале праўладны Цэнтр грамадскага назірання за выбарамі (ЦГНВ), які акумулюе інфармацыю з месцаў аб ходзе галасавання.

Чаму чалавек спрабаваў вынесці два з трох выдадзеных бюлетэняў, невядома.

Камісіяй складзены адпаведны акт, “сітуацыя перададзена для далейшага разбору ў праваахоўныя органы”.

“А мы нагадваем: за вынас выдадзенага бюлетэня прадугледжаны штраф у памеры да 600 рублёў”, — гаворыцца ў рэлізе.

ЦГНВ заявіў, што “ў любым выпадку, няведанне закона не вызваляе ад адказнасці”.

Таксама паведамляецца, што адзін з тых, хто звярнуўся ў чат-бот цэнтра, “паскардзіўся: нібыта адсутнасць шторак у кабін на выбарчым участку парушае таямніцу галасавання”: “Мы паглядзелі на месцах: кабіны для галасавання размешчаны такім чынам, што таямніца галасавання выконваецца”.

Назіральнікі не ўдакладняюць, па якім артыкуле можа наступіць адказнасць. Штрафную санкцыю да 15 базавых велічыняў (600 рублёў на сёння) утрымлівае арт. 10.9 КаАП (парушэнне заканадаўства аб выбарах, рэферэндуме, рэалізацыі права заканадаўчай ініцыятывы грамадзян).

20 лютага ў Беларусі пачалося датэрміновае галасаванне па выбарах дэпутатаў Палаты прадстаўнікоў і мясцовых саветаў.

У гэтым годзе ўпершыню ў Беларусі пройдуць аб’яднаныя выбары — адзіны дзень галасавання прызначаны на 25 лютага.

На 110 месцаў у ПП НС восьмага склікання прэтэндуе 265 кандыдатаў (з іх 10 грамадзян ва ўзросце да 31 года, 92 жанчыны; самаму маладому кандыдату ў дэпутаты – 23 гады. Самаму старэйшаму – 66 гадоў).

На 12.512 месцаў у мясцовых саветах прэтэндуе 18.802 чалавекі.

Для арганізацыі выбараў у адзіны дзень галасавання 25 лютага ўтворана 5.411 выбарчых камісій, у склад якіх увайшло 57.233 чалавекі.

Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі.

Пасля прэзідэнцкіх выбараў 2020 года ўлады выкарыстоўваюць выключна адчыненыя кабінкі для галасавання.

Назіраць за выбарамі запрошаны прадстаўнікі СНД, Парламенцкай асамблеі АДКБ.

Мясцовыя назіральнікі ў большасці сваёй праўладныя.

Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе (БДІПЧ АБСЕ) запрашэння не атрымала.

З 19 лютага асабовы склад органаў унутраных спраў і ўнутраных войскаў пераведзены на ўзмоцнены варыянт службы, які прадугледжвае кругласутачнае дзяжурства на ўсіх выбарчых участках.

З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.