Афіцыйная яўка на датэрміновае галасаванне паставіла чарговы рэкорд — амаль 15% за два дні
Старшыня Камітэта дзяржкантролю Васіль Герасімаў галасуе датэрмінова
22 лютага, Позірк. За два дні датэрміновага галасавання на выбарах у Палату прадстаўнікоў і мясцовыя саветы яўка склала 14,61%, паведаміла Цэнтральная выбарчая камісія. У першы дзень яўка нібыта была на ўзроўні 5,94%.
Нягледзячы на адмену парога яўкі (50%), паводле сцвярджэння ЦВК, 20 і 21 лютага ў Гомельскай вобласці ўжо прагаласавала 17,55% выбаршчыкаў (у першы дзень — 5,72%), у Магілёўскай — 15,61% (6,67%), Брэсцкай — 14,85% (6,13%), Мінскай — 14,76% (6,33%), Віцебскай — 14,25% (6,11%), Гродзенскай — 10,57% (4,02%), у Мінску — 13,80% (6,19%).
Афіцыйныя паказчыкі датэрміновай яўкі па выніках першага і двух дзён — рэкордныя за гісторыю правядзення выбарчых кампаній, сведчыць праведзены “Позіркам” аналіз архіўных даных ЦВК.
Напрыклад, яўка па выніках двух дзён датэрміновага галасавання на папярэдніх парламенцкіх выбарах у 2019 годзе была абвешчаная на ўзроўні 11,51%, у 2016 годзе — 9,63%, у 2012-м — 7,2%, у 2008-м — 7%.
На прэзідэнцкіх выбарах 2020 года гэты паказчык складаў 12,75%, 2015-га — 10,94%, 2010-га — 7,2%, 2006-га — 6,1%.
У параўнанні з першым днём датэрміновага галасавання на канстытуцыйным рэферэндуме 2022 года яўка была ніжэйшай (5,94% супраць 6,19%), з двума днямі — вышэйшай (14,61% супраць 14,53%).
Датэрміновае галасаванне працягнецца да 24 лютага. Асноўны дзень — 25 лютага. Да выбараў дапушчаныя толькі лаяльныя рэжыму кандыдаты ў дэпутаты.
Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі.