ЦВК абвясціў аб яўцы траціны выбаршчыкаў за чатыры дні датэрміновага галасавання — чарговы рэкорд

23 лютага, Позірк. За чатыры дні датэрміновага галасавання на выбарах у Палату прадстаўнікоў і мясцовыя саветы яўка склала 33,61%, паведаміла Цэнтральная выбарчая камісія. У першы дзень яўка нібыта была на ўзроўні 5,94%, па выніках двух дзён — 14,61%, трох — 24,44%.

Нягледзячы на адмену парога яўкі (50%), паводле сцвярджэння ЦВК, 20–23 лютага ў Гомельскай вобласці ўжо прагаласавала 42,83% выбаршчыкаў (у першы дзень — 5,72%; за два дні — 17,55%; за тры — 30,68%), у Магілёўскай — 37,27% (6,67%; 15,61%; 26,07%), Брэсцкай — 35,04% (6,13%; 14,85%; 25,48%), Мінскай — 32,16% (6,33%; 14,76%; 23,56%), Віцебскай — 33,05% (6,11%; 14,25%; 23,39%), Гродзенскай — 30,69% (4,02%; 10,57%; 20,30%), у Мінску — 26,04% (6,19%; 13,80%; 21,35%).

Афіцыйныя паказчыкі датэрміновай яўкі па выніках першага, двух, трох і чатырох дзён — рэкордныя за гісторыю правядзення выбарчых кампаній, сведчыць праведзены “Позіркам“ аналіз архіўных даных ЦВК.

Напрыклад, яўка па выніках чатырох дзён датэрміновага галасавання на папярэдніх парламенцкіх выбарах у 2019 годзе была абвешчаная на ўзроўні 27,5%, у 2016 годзе — 24,31%, у 2012-м — 19,6%, у 2008-м — 18,8%, у 2004-м — 13,72%.

На прэзідэнцкіх выбарах 2020 года гэты паказчык складаў 32,24%, 2015-га — 28,09%, 2010-га — 17,4%, 2006-га — 22,5%.

У параўнанні з першым днём датэрміновага галасавання на канстытуцыйным рэферэндуме 2022 года яўка была ніжэйшай (5,94% супраць 6,19%), з двума і трыма днямі — вышэйшай (14,61% супраць 14,53% і 24,44% супраць 24,08%), чатырма днямі — ніжэйшай (33,61% супраць 34,29%).

Датэрміновае галасаванне працягнецца да 24 лютага. Асноўны дзень — 25 лютага. Да выбараў дапушчаныя толькі лаяльныя рэжыму кандыдаты ў дэпутаты.

Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі.