Захаду “будзе сорамна за платы” вакол Беларусі і РФ, заяўляе дзяржсакратар СД Мезенцаў
5 сакавіка, Позірк. “Пройдзе час, Захаду будзе сорамна за тыя платы, якія ён выбудоўвае вакол Беларусі і Расіі”, — заявіў на адкрыцці дзён Гродзенскай вобласці ў рамках выставы-форуму “Расія” ў Маскве дзяржсакратар Саюзнай дзяржавы (СД) Дзмітрый Мезенцаў.
Паводле слоў Мезенцава, якога цытуе ТАСС, краіны Захаду аказваюць на Беларусь і РФ ціск “толькі дзеля таго, каб прынізіць наш патэнцыял” і каб расіяне і беларусы “думалі не сваім розумам”, а ішлі за заходнімі каштоўнасцямі.
Адзначаецца, што так Мезенцаў адрэагаваў на рэпліку старшыні Гродзенскага аблвыканкама Уладзіміра Караніка, які заявіў, што “разумныя будуюць масты, а дурні платы”.
Гэтую ж фразу неаднаразова прамаўлялі іншыя высокапастаўленыя беларускія чыноўнікі на фоне будаўніцтва суседнімі краінамі ЕС загарод на межах з Беларуссю.
Загароды Польшча, Літва і Латвія пачалі будаваць у сувязі з міграцыйным крызісам, які пачаўся ўвесну 2021 года.
Польшча завяршыла ўзвядзенне 206-кіламетровага плота ўздоўж мяжы з Беларуссю ў чэрвені 2023 года.
22 снежня МУС Латвіі паведаміла, што будаўніцтва плота на латвійска-беларускай мяжы ідзе па плане, яго сухапутная частка будзе ўзведзеная “да канца года”. Адзначалася, што на той момант пабудавана 110,1 (98%) з запланаваных у 2023 годзе 112 км памежнай агароджы ўздоўж мяжы агульнай працягласцю 173 км.
Літва завяршыла будаўніцтва агароджы ў жніўні 2022 года.
Фізічны бар’ер стаў адным з галоўных фактараў, якія дазволілі вырашыць міграцыйны крызіс на межах ЕС з Беларуссю.
Беларускія ўлады неаднаразова крытыкавалі суседнія краіны за гэтае рашэнне нібыта з меркаванняў абароны прыроды.
Маюцца шматлікія сведчанні аб удзеле супрацоўнікаў беларускіх сілавых ведамстваў у перамяшчэнні нелегалаў праз мяжу з ЕС.
У лістападзе 2021 года ў інтэрв’ю BBC Аляксандр Лукашэнка “цалкам дапусціў”, што сілавікі дапамагаюць мігрантам незаконна перасякаць мяжу.
“Нашы дапамагаюць ім перабрацца на польскую тэрыторыю, так? Слухайце, цалкам магчыма. Магчыма, хтосьці і дапамог, і я нават не буду разбірацца. Я і сказаў, я не буду іх затрымліваць на мяжы, трымаць іх на мяжы. Паўтараю: і надалей не буду іх трымаць на мяжы, калі яны будуць ісці праз Беларусь. Таму што яны ідуць не да мяне, а да вас. Вы перасталі выходзіць на кантакт і працаваць. Не хочаце — не трэба. Мы без вас будзем вырашаць гэтую праблему. Так, як атрымаецца. Але я іх сюды не запрашаў”, — сказаў Лукашэнка.
Паводле ацэнак шэрагу экспертаў, міграцыйны крызіс быў інспіраваны Мінскам (некаторыя лічаць, сумесна з Масквой) з мэтай помсты Захаду за ацэнку палітычных падзей 2020 года ў Беларусі і ўвядзенне санкцый, а таксама для прымусу еўрапейскіх палітыкаў да дыялогу з рэжымам Лукашэнкі.
Гл. таксама:
Прэм’ер Польшчы: Загарода на мяжы з Беларуссю будзе мадэрнізаваная ў самыя кароткія тэрміны
