25 верасня, Позірк. Роўна паўгода прайшло з пачатку штодзённых спробаў мігрантаў з трэціх краін трапіць у Еўрасаюз праз беларуска-латвійскую мяжу.
З 25 сакавіка па 24 верасня (184 дні), як сведчыць праведзены “Позіркам“ аналіз масіву аператыўных даных Дзяржаўнай памежнай аховы Латвіі, зафіксавана 11.242 спробы пераходу, або ў сярэднім 61 штосутачна.
З пачатку 2026 года па 24 сакавіка была адзначаная 141 спроба, або менш за 2 у дзень, пры гэтым з 1 студзеня па 1 лютага актыўнасць мігрантаў не назіралася зусім.
Доля Латвіі ў агульнай колькасці спробаў пранікнення нелегалаў у Еўрасаюз праз Беларусь за перыяд з пачатку года склала 84,7% (11.383 з 13.436).
Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.
Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта паклікалі.
