У “спіс экстрэмістаў” дададзена 19 чалавек, у тым ліку фігуранты “справы ByPol”

7 сакавіка, Позірк. Міністэрства ўнутраных спраў 7 сакавіка ўнесла ў спіс “асоб, якія маюць дачыненне да экстрэмісцкай дзейнасці”, яшчэ 19 чалавек, у тым ліку трох жанчын, — цяпер у ім 3.864 пазіцый, сведчыць абноўлены дакумент на сайце ведамства.

У спіс унеслі палітвязняў Максіма Анціпенку, Ігара Іванова, Андрэя Карабіцына, Віталя Бажка, Мікіту Вілейшчыкава.

На невядомы тэрмін пазбаўлення або абмежавання волі асуджаныя Анціпенка — паводле арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх), Карабіцын і Вілейшчыкаў — паводле арт. 368 КК (абраза прэзідэнта), Бажок — паводле арт. 369 КК (абраза прадстаўніка ўлады).

Іваноў асуджаны на тры гады абмежавання волі ў папраўчай установе адкрытага тыпу. Паводле звестак праваабаронцаў цэнтра “Вясна”, ён прызнаны вінаватым паводле арт.369 КК. У тлумачэннях МУС пазначаныя арт. 368 і 367 (паклёп у дачыненні да прэзідэнта) КК.

У пералік уключаныя шасцёра фігурантаў “справы ByPol”, якія знаходзяцца ў вышуку: Аляксандр Азараў, Уладзімір Жыгар, Мацвей Купрэйчык, Ігар Лобан, Андрэй Астаповіч, Алег Талерчык.

Заснавальнікі, прадстаўнікі і экс-удзельнікі аб’яднання былых сілавікоў ByPol (летам 2023 года падзялілася на ByPol і BelPol) у лютым гэтага года завочна прыгавораныя да доўгіх тэрмінаў зняволення: Азараў — да 25 гадоў, Купрэйчык, Жыгар, Лобан і Талерчык — да 12 гадоў, Астаповіч — да 11.

Яны прызнаныя вінаватымі ў “дзеяннях, учыненых з мэтай захопу дзяржаўнай улады неканстытуцыйным шляхам”, “наўмысных дзеяннях, накіраваных на ўзбуджэнне сацыяльнай варожасці і варажнечы па прыкмеце іншай сацыяльнай прыналежнасці, учыненых групай асоб”.

Пры гэтым Азараў таксама “прызнаны вінаватым у здрадзе дзяржаве, арганізацыі акта тэрарызму і наўмыснага разбурэння сродкаў сігналізацыі на аб’ектах чыгункі”.

Згодна з заканадаўствам, фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.

На працягу пяці гадоў пасля выканання судовых рашэнняў людзі з гэтага пераліку не могуць займацца педагагічнай і выдавецкай дзейнасцю, быць на дзяржслужбе, карыстацца зброяй.