Беларусь і Бангладэш абмеркавалі ўзаемадзеянне ў прамкааперацыі і сельскай гаспадарцы
11 сакавіка, Позірк. У ходзе сустрэчы намесніка міністра замежных спраў Беларусі Яўгена Шастакова з міністрам гандлю Бангладэш Ахсанулам Ісламам Ціту дасягнутая дамоўленасць аб арганізацыі ў 2024 годзе другога пасяджэння сумеснай Беларуска-Бангладэшскай камісіі па гандлёвым і эканамічным супрацоўніцтве.
Сустрэча міністраў адбылася ў рамках другога дня працоўнага візіту Шастакова ў Даку, паведаміла 11 сакавіка прэс-служба беларускага МЗС.
Адзначаецца, што на сустрэчы “разгледжаныя актуальныя пытанні пашырэння гандлёва-эканамічнага супрацоўніцтва паміж Беларуссю і Бангладэш”. Таксама бакі дамовіліся “актывізаваць работу па рэалізацыі шэрагу праектаў, якія ўяўляюць узаемную цікавасць”.
Беларускую дэлегацыю прыняў таксама кіраўнік МЗС Бангладэш Хасан Махмуд, з якім узгодненыя “падыходы да далейшага развіцця беларуска-бангладэшскага дыялогу ў палітычнай і гандлёва-эканамічнай сферах”.
На сустрэчы Шастакова з міністрам мясцовага самакіравання, развіцця сельскай мясцовасці і кааператываў Тазулам Ісламам, міністрам сельскай гаспадаркі Абдусам Шахідам і старшынёй Бангладэшскай карпарацыі развіцця сельскай гаспадаркі Абдулам Сазадам бакі абмеркавалі “ўзаемадзеянне ў эканамічнай сферы, у першую чаргу прамысловай кааперацыі і сельскай гаспадарцы”.
Падчас візіту Шастакоў правёў перамовы ў Федэрацыі гандлёва-прамысловых палат Бангладэш з прадстаўнікамі бангладэшскіх дзелавых колаў, “зацікаўленых у развіцці супрацоўніцтва з Беларуссю”. Паведамляецца, што па выніках сустрэчы “дасягнутая дамоўленасць аб абмене візітамі бізнес-дэлегацый дзвюх краін у бягучым годзе па напрамках узаемнай цікавасці”.
10 сакавіка ў Даке намеснік кіраўніка беларускага МЗС абмеркаваў з бангладэшскім калегам Масудам бін Маменам актывізацыю палітычнага і гандлёва-эканамічнага супрацоўніцтва.
Таксама гаворка ішла аб пашырэнні дагаворна-прававой базы двухбаковых адносін і арганізацыі дзелавых візітаў.
Паведамлялася, што былі дасягнуты “прадметныя дамоўленасці па першачарговых кроках для нарошчвання дыялогу Мінска і Дакі ў розных сферах”.
Бакі разгледзелі “шырокі спектр пытанняў беларуска-бангладэшскіх адносін, уключаючы супрацоўніцтва ў навукова-тэхнічнай сферы, у галіне адукацыі, культуры і турызму, а таксама ўзаемадзеянне ў міжнародных арганізацыях”, абмяняліся думкамі “па актуальных пытаннях рэгіянальнага і глабальнага парадку дня”.
Паводле інфармацыі прэс-службы МЗС, Шастакоў наведвае краіну да 12 сакавіка.
У жніўні 2023 года кіраўнік ведамства Сяргей Алейнік і прэм’ер-міністр Бангладэш Шэйх Хасіна абмеркавалі “сітуацыю з беларускімі калійнымі ўгнаеннямі” (знаходзяцца пад санкцыямі ЕС. — “Позірк“.), паведамляў афіцыйны Мінск.
Дыпламатычныя адносіны паміж Беларуссю і Народнай Рэспублікай Бангладэш устаноўленыя ў лютым 1992 года. У краіне акрэдытаваны па сумяшчальніцтве пасол у Індыі Аляксандр Ржэвускі.
Двухбаковае пагадненне аб гандлёва-эканамічным супрацоўніцтве ўступіла ў сілу ў траўні 2012 года.
Паводле звестак МЗС Беларусі, за 2021 год тавараабарот з Бангладэш узрос да 177 млн долараў (+56,2%), з іх беларускі экспарт вырас да 149,8 млн долараў (+71,8%), імпарт вырас да 27,2 млн долараў (+4,1%). Дадатнае сальда — 122,6 млн.
Беларусь пастаўляла калійныя ўгнаенні, малако і вяршкі, драты ізаляваныя і кабеля, цэлюлозу, паперу, профілі з сталі і інш.
Імпарт бангладэшскіх тавараў — гародніна, садавіна, тэкстыль, адзенне.