Праваабаронцы прызналі палітвязнямі яшчэ 10 чалавек, у тым ліку двух грамадзян Украіны

12 сакавіка, Позірк. Беларуская праваабарончая супольнасць прызнала палітвязнямі яшчэ 10 чалавек, цяпер такі статус у Беларусі мае 1.418 чалавек, вынікае з сумеснай заявы, апублікаванай на сайце цэнтра “Вясна”.

Такімі прызнаныя асуджаныя паводле арт. 130 Крымінальнага кодэкса (распальванне расавай, нацыянальнай, рэлігійнай або іншай сацыяльнай варожасці або варажнечы):

Дзяніс Красько (3 гады пазбаўлення волі);
Дзмітрый Шчарбін (1 год пазбаўлення волі);
Яўген Кіслоў (5 гадоў пазбаўлення волі; таксама асуджаны паводле ч. 1 арт. 293 — “арганізацыя масавых беспарадкаў”, арт. 369 — “абраза прадстаўніка ўлады”, арт. 368 — “абраза прэзідэнта”, арт. 361¹ — “стварэнне экстрэмісцкага фарміравання або ўдзел у ім”, арт. 361⁴ — “садзейнічанне экстрэмісцкай дзейнасці”).

Таксама палітвязнямі прызнаныя тыя, хто знаходзіцца пад вартай:

Кацярына Новікава (абвінавачваецца паводле ч. 3 арт. 130 і ч. 3 арт. 203¹ — “незаконныя дзеянні ў дачыненні да інфармацыі аб прыватным жыцці і персанальных звестках”);
Антон Чарамных (абвінавачваецца паводле арт. 130);
Раман Галуза — (абвінавачваецца паводле арт. 356 — “здрада дзяржаве”);
Андрэй Шмай (абвінавачваецца паводле арт 358¹ — “агентурная дзейнасць”; грамадзянін Украіны);
Наталля Захаранка (абвінавачваецца паводле арт. 358 — “шпіянаж”; грамадзянка Украіны);
Іван Сухамераў (абвінавачваецца паводле дзесяці крымінальных артыкулаў, у тым ліку паводле арт. 356, ч. 2 арт. 290⁵ КК — “арганізацыя дзейнасці тэрарыстычнай арганізацыі і ўдзел у дзейнасці такой арганізацыі”; справа разглядаецца ў закрытым рэжыме);
Аляксей Кулікоў (абвінавачваецца паводле арт. 358¹, арт. 289 — “акт тэрарызму”, арт. 126 — “акт міжнароднага тэрарызму”; справа разглядаецца ў закрытым рэжыме).

Праваабаронцы патрабуюць ад уладаў перагледзець вынесеныя ім выракі або меру стрымання “пры выкананні права на справядлівае разбіральніцтва і ліквідацыі фактараў, якія паўплывалі на кваліфікацыю дзеянняў, выгляд і памер пакарання”; неадкладна вызваліць усіх палітвязняў, перагледзець палітычна матываваныя прыгаворы і спыніць рэпрэсіі супраць грамадзян краіны.

Апрача “Вясны” заяву падпісалі Lawtrend, Human Constanta, “Прававая ініцыятыва”, Беларускі дом правоў чалавека імя Барыса Звозскава.