За год пагалоўе свіней скарацілася больш чым на 500 тыс.

17 сакавіка, Позірк. На 1 сакавіка 2024 года пагалоўе буйной рагатай жывёлы (каровы, быкі, цяляты і інш.) у Беларусі складала 4 млн 108,3 тыс. — на 1,1% менш, чым на аналагічную дату 2023-га (-46,6 тыс.), сведчаць даныя Нацыянальнага статыстычнага камітэта.

У параўнанні з 1 сакавіка 2019-га зніжэнне склала 141,1 тыс. галоў (-3,32%).

Пагалоўе кароў у сакавіку 2024-га склала 1 млн 395,6 тыс. — на 2,4 тыс. менш (-0,17%) у гадавым вымярэнні, і на 34,9 тыс. (-2,44%) — чым пяць гадоў таму.

Свіней налічвалася 2 млн 279,2 тыс. (-517,9 тыс., -18,52%; -214,3 тыс., -8,59% адпаведна).

Птушкі — 48 млн 481,1 тыс. (+1 млн 143,2 тыс., +2,41%; +716,7 тыс., +1,5%).

22 верасня 2023 года ў Салігорску (Мінская вобласць) на семінары-нарадзе аб развіцці жывёлагадоўлі Аляксандр Лукашэнка заявіў, што ў 2022 годзе вытворчасць буйной рагатай жывёлы знізілася ў Гомельскай, Віцебскай і Магілёўскай абласцях.

На той час, паводле звестак Лукашэнкі, рост падзяжу дапушчаны ў 53 раёнах, а ў 14 перавысіў леташні ўзровень у 1,5 разы. У Чашніцкім раёне Віцебскай вобласці падзёж вырас амаль у 3 разы, у Краснапольскім раёне Магілёўскай вобласці — у 4.

У асобных сельгасарганізацыях жывёлу ўтрымліваюць у антысанітарных умовах, адсутнічае падсцілачны матэрыял, не своечасова прыбіраецца гной, не выконваюцца рацыёны кармлення і тэмпературны рэжым, заявіў Лукашэнка, падкрэсліўшы, што гэта “апошняе папярэджанне”: “Прымайце рашэнні і дзейнічайце. Дзе старшыні райвыканкамаў? Да гэтага звяна мы вернемся прынцыпова і сур’ёзна. Старшыняў райвыканкамаў за губернатарамі наогул не відаць”.

У сакавіку 2019 года ён зладзіў “кадравую чыстку” падчас наведвання аграхолдынга “Купалаўскі” ў Магілёўскай вобласці. Умовы ўтрымання жывёлы ён параўнаў з Асвенцымам — нацысцкім лагерам смерці на тэрыторыі Польшчы ў гады Другой сусветнай вайны.

У 2022 годзе, паводле інфармацыі МУС, было ўзбуджана 480 крымінальных спраў, звязаных з утойваннем падзяжу, на 1 снежня 2023-га — 205, што склала траціну агульнай колькасці эканамічных злачынстваў у аграрнай сферы.