Вільнюс і Варшава ўпісаныя ў каардынаты расійскай ТЯЗ, але перадумоў яе выкарыстання амаль няма — эксперт

Апублікавана на адкрытай версіі “Позірку” 27 сакавіка 2024 года

26 сакавіка, Позірк. Вільнюс і Варшава “ўпісаныя ў каардынаты” расійскай тактычнай ядзернай зброі, але разам з тым існуе пытанне, наколькі гэтую зброю могуць і будуць выкарыстоўваць, заявіў у каментары “Позірку” палітолаг, спецыяліст у пытаннях нацыянальнай бяспекі Аляксандр Казак.

Каментуючы выказванні прадстаўніка Аб’яднанага пераходнага кабінета (АПК) па абароне і нацыянальнай бяспецы Валера Сахашчыка, які заявіў, што Расія і Беларусь рыхтуюць планы выкарыстання ядзернай зброі і “нейкага бліцкрыгу на Вільнюс”, эксперт адзначыў, што такія заявы маглі быць выкліканыя, “па-першае, сітуацыяй з Беларуссю, якую трэба вяртаць у інфармацыйны кантэкст і дыскурс”. “Так або інакш Беларусь разглядаецца на планах, стратэгіях і тактыках”, — сказаў суразмоўца.

“Па-другое, трэба спытаць у Сахашчыка, адкуль ён валодае такой інфармацыяй, каб зразумець, ад каго гэта сыходзіць, але не маючы на ўвазе, што ён можа хлусіць, — падкрэсліў Казак. — Ізноў жа, Паўночная Карэя, мабыць, таксама будуе планы атак на Паўднёвую, плануе вайну з ЗША і супрацоўнічае з Расіяй. Таму абсалютна нармальна, што ў Беларусі і РФ ёсць пэўныя планы, дзе каго атакаваць і чым бамбардаваць”.

Як мяркуе суразмоўца, сталіцы Літвы і Польшчы, хоць і ўпісаныя ў каардынаты ТЯЗ, перадумоў яго выкарыстання “амаль што няма”.

У якасці прыкладу эксперт прывёў ракетную атаку РФ па плаціне ДняпроГЭСа 22 сакавіка, “і тое, што магло здарыцца ў яе выніку, як здарылася з Кахоўскай ГЭС”, на погляд Казака, “параўнальна з выкарыстаннем ядзернай зброі”.

“Але ідзе трэці год паўнамаштабнага ўварвання ва Украіну, і, канешне, былі ідэі, але не было факту выкарыстання падобнай зброі, карысталіся нечым іншым. Ці будзе ядзерны ўдар па краінах НАТО? Я не думаю”, — сказаў суразмоўца.

Казак адзначыў, што “ў публічнай прасторы на дадзеную хвіліну няма інфармацыі пра ядзерную зброю на тэрыторыі Беларусі”, “тэарэтычна яна ёсць, але выведкі і аналітыкі паўнавартасна гэта не падцвярджаюць”.

Паводле слоў эксперта, у кантэксце магчымай вайны з НАТО вельмі важна карыстацца досведам Украіны: “Мы памятаем, што быў перакід войскаў і потым адбылося ўварванне”.

“Таксама быў парогавы момант адносна магчымасці вайны”, — нагадаў Казак, маючы на ўвазе эвакуацыю з Украіны дыпламатаў ЗША, Расіі, іншых краін, а таксама сем’яў вайскоўцаў напярэдадні паўнамаштабнага ўварвання. “Таму нешта падобнае павінна адбывацца і ў выпадку магчымай атакі на краіны НАТО. Праціўнік вучыцца, і не варта яго недаацэньваць. Няма дэвальвацыі магчымасцяў расійскіх вайскоўцаў унутры НАТО. Лепей падрыхтаваць сваё насельніцтва, паказаць, што мы гатовыя, падрыхтаваныя, паспрабуйце, калі вы такія моцныя і амбітныя”, — падсумаваў эксперт.

Аб планах выкарыстання Расіяй і Беларуссю ядзернай зброі і падрыхтоўцы нападу на Вільнюс Валер Сахашчык заявіў 24 сакавіка ў Варшаве на мітынгу з нагоды Дня Волі.

“Я гэта дакладна ведаю”, — сказаў ён, дадаўшы, што “беларускія генералы са сваімі калегамі з Масквы малююць стрэлкі на мапах у бок Вільнюса”. Паводле слоў Сахашчыка, улады Расіі і Беларусі спадзяюцца, што “цывілізаваны свет будзе шакаваны” такой эскалацыяй агрэсіі і “спыніць супраціў”.

Выкарыстанне ядзернай зброі і напад на Літву Масква і Мінск плануюць праз няўдачы ў вайне з Украінай, выказаў меркаванне прадстаўнік АПК.

“Мы бачым, як Расія спрабуе скарыстацца тым, што заходнія краіны зрабілі перапынак у дапамозе Украіне. Расія кінула ўсе свае рэзервы і паспрабавала пераламіць сітуацыю на фронце, і нічога ў яе не атрымалася”, — заявіў Сахашчык.

14 сакавіка амерыканскае выданне Foreign Policy паведаміла, што Расія перамясціла тактычную ядзерную зброю ад сваіх межаў у Беларусь, “на некалькі сотняў міль бліжэй да тэрыторыі НАТО”.

Са спасылкай на “заходніх чыноўнікаў” сцвярджалася, што гэта адбылося, бо “расійскі прэзідэнт Уладзімір Пуцін пагражае больш шырокімі вайсковымі сутыкненнямі з альянсам праз яго сталую падтрымку Украіны”.

Федэрацыя амерыканскіх навукоўцаў (FAS), спасылаючыся на ўцечку дакументаў са справаздачы ЦРУ, заявіла пра “нядаўнюю мадэрнізацыю вайсковага склада ў цэнтральнай Беларусі”.

Паводле інфармацыі FAS, тэрыторыя склада была абсталявана “дадатковымі перыметрамі бяспекі і кропкай доступу на яго верагоднае прызначэнне для размяшчэння расійскіх ядзерных боегаловак для пастаўленых Беларусі ракетных установак “Іскандэр”.

Адзначалася, што на спадарожнікавым здымку, прадстаўленым кампаніяй Maxar Technologies, бачная частка дэпо каля Асіповічаў, якая была з тых часоў таксама мадэрнізаваная і абсталяваная перыметрам бяспекі з чатырох агародж і крытай ахоўнай кропкай доступу. У абноўленым дэпо “Асіповічы” перыметр аховы павялічаны ў чатыры разы.

4 лютага начальнік узбраення Узброеных сіл Беларусі Андрэй Федзін заявіў, што размяшчэнне ў краіне расійскай тактычнай ядзернай зброі — “вельмі важкі фактар стратэгічнага стрымлівання”.