Брэсцкія дэсантнікі праводзяць вучэнні з улікам досведу вайны ва Украіне
Вучэнні вайскоўцаў 38-й брыгады (сакавік 2024 года)
28 сакавіка, Позірк. “Практычныя дзеянні і тактычныя элементы” з улікам “досведу спецыяльнай ваеннай аперацыі” адпрацоўваюць на вучэннях падраздзяленні 38-й Брэсцкай асобнай дэсантна-штурмавой брыгады, паведаміла 28 сакавіка прэс-служба Міністэрства абароны.
“Спецыяльнай ваеннай аперацыяй” (“СВА”) расійскія і беларускія ўлады называюць вайну, развязаную РФ супраць Украіны.
“Дэсантнікі адпрацоўваюць комплекс тактычных задач на розных участках мясцовасці, — заяўляе ваеннае ведамства. — Асаблівая ўвага надаецца працы са сродкамі ўзмацнення, ужыванню беспілотных лятучых апаратаў, тактычнай медыцыне”.
Адметна, што ў 1998–2001 гадах камандзірам 38-й брыгады быў Валерый Сахашчык, які зараз займае пасаду прадстаўніка Аб’яднанага пераходнага кабінета па абароне і нацыянальнай бяспецы.
Праверка баявой гатоўнасці злучэнняў і вайсковых часцей Беларусі мае “комплексны характар”, яе мерапрыемствы “будуць нарошчвацца”, заявіў 15 сакавіка начальнік Генеральнага штаба Узброеных сіл Віктар Гулевіч.
19 сакавіка Мінабароны паведамляла, што на зборы прызвана да 5 тыс. ваеннаабавязаных.
Праз некалькі дзён, 22 сакавіка, ваеннае ведамства адрапартавала, што досвед так званай “СВА” прымяняецца для “баявой падрыхтоўкі” беларускіх ракетчыкаў і артылерыстаў.
Паводле слоў міністра абароны Віктара Хрэніна, праверка боегатоўнасці ў Беларусі з’яўляецца рэакцыяй на працэсы мілітарызацыі ў сумежных краінах Захаду. “Хачу падкрэсліць, мы робім гэта для таго, каб навучыць сваіх вайскоўцаў. Палепшыць пытанні баявой і мабілізацыйнай гатоўнасці, падвысіць навыкі ў пытаннях дзеянняў на незнаёмых участках мясцовасці”, — заявіў ён.
