Пачата спецвытворчасць у дачыненні да актывістаў Міцкевіча і Чашчавіка

3 красавіка, Позірк. Аб пачатку спецыяльнай вытворчасці ў дачыненні да палітычных актывістаў Паўла Міцкевіча і Дзяніса Чашчавіка паведаміў 2 красавіка Следчы камітэт.

Па інфармацыі профільнага тэлеграм-канала Следчага камітэта, Міцкевічу інкрымінуецца ч. 1 арт. 361⁴ (садзейнічанне экстрэмісцкай дзейнасці), Чашчавіку — ч. 2 арт. 361⁴ (садзейнічанне экстрэмісцкай дзейнасці, учыненае паўторна).

Абаім прапануецца з’явіцца ва ўпраўленне СК па Гродзенскай вобласці.

Павал Міцкевіч — кіраўнік беластоцкага фонду “Okno na Wschód” (Польшча), Дзяніс Чашчавік — таксама палітэмігрант.

Крымінальная спецвытворчасць узбуджалася ў агульнай колькасці ў дачыненні да 90 чалавек. Гэты механізм прымяняецца супраць абвінавачанага, які знаходзіцца за межамі Беларусі і ўхіляецца ад яўкі ў орган, які вядзе крымінальны працэс. Магчымы па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.