Мінадукацыі ўводзіць для малодшакласнікаў факультатыў “Азбука маральнасці”

3 красавіка, Позірк. Міністэрства адукацыі зацвердзіла вучэбную праграму факультатыўных заняткаў “Азбука маральнасці” для школьнікаў 2–3 класаў. Дакумент апублікаваны 3 красавіка на нацыянальным правам партале.

У пастанове ведамства адзначаецца, што “вучэбная праграма накіраваная на стварэнне ўмоў для фарміравання ў вучняў уяўленняў аб маральных асновах зносін, развіццё маральных пачуццяў <…>, выхаванне высокіх маральных якасцяў <…>, фарміраванне нормаў паводзін <…>, з дапамогай твораў дзіцячай літаратуры, мультыплікацыйных фільмаў, музычных твораў, прыказак і прымавак”.

Праграма разлічаная на 69 гадзін: 2 клас — 34 гадзіны, 3 клас — 35 гадзін (па 1 гадзіне ў тыдзень) і складаецца з васьмі модуляў.

Другі модуль называецца “З чаго пачынаецца Радзіма?” і, паводле свярджэння аўтараў дакумента, “садзейнічае ўсведамленню навучэнцамі паважлівага стаўлення да дзяржаўных сімвалаў Рэспублікі Беларусь як праявы патрыятызму і адказнасці за будучыню краіны, знаёміць малодшых школьнікаў з маральнымі асновамі подзвігу, маральнай ацэнкай гераічных учынкаў беларускага народа ў гады Вялікай Айчыннай вайны”.

Сярод патрабаванняў да вынікаў факультатыўных заняткаў у 2-х класах — засваенне правілаў паводзін пры выкананні гімна Беларусі, атрыманне ведаў аб паходжанні асноўных дзяржаўных сімвалаў, маральных пачуццях, маральных якасцях чалавека і інш.

Вучні 3 класа па выніках праходжання праграмы павінны будуць ведаць аб маральных пачуццях, у тым ліку абавязку і гонару, і інш., а таксама, “імёны беларускіх школьнікаў — герояў Вялікай Айчыннай вайны (Зіна Партнова, Марат Казей, Лёня Голікаў, Мікалай Гойшык, Валя Зенкіна)”.

Акрамя таго, па выніках навучання, трэцякласнікі змогуць назваць “памятныя месцы ў Беларусі (помнікі, мемарыяльныя комплексы), дзе ўвекавечаная памяць аб Вялікай Айчыннай вайне”: Музей гісторыі ВАВ, Брэсцкая крэпасць, мемарыяльны комплекс “Хатынь”, Курган Славы, Плошча Перамогі, мемарыяльны комплекс “Чырвоны Бераг”, “Манумент у гонар савецкай маці патрыёткі ў Жодзіне”.

Для тлумачэння другакласнікам паняццяў “Рэспубліка Беларусь, народ, беларус, беларуска” Мінадукацыі рэкамендуе пералік твораў для вывучэння, у прыватнасці, песні “З чаго пачынаецца Радзіма?” і шэраг іншых.

Пастанова ўступае ў сілу пасля яе афіцыйнага апублікавання.

Новы інтэграваны курс “Гісторыя Беларусі ў кантэксце сусветнай гісторыі” з’явіцца 1 верасня ў 10-х класах школ, паведаміў міністр адукацыі Андрэй Іванец у лютым. Як адзначылі ў прэс-службе Мінадукацыі ў сувязі з новым падручнікам, “важна, каб дзеці разумелі, чаму адбыліся тыя ці іншыя падзеі, як яны звязаныя”.

5 снежня 2023 года падчас пасяджэння Рэспубліканскага савета па гістарычнай палітыцы пры адміністрацыі Аляксандра Лукашэнкі стала вядома, што абавязковым для вывучэння школьнікамі ў наступным навучальным годзе плануецца зрабіць прадмет “Гісторыя беларускай дзяржаўнасці”.

У 2022 годзе адбыліся змены ў школьнай праграме. Сярод іншага ў школьным адукацыйным працэсе сталі выкарыстоўваць інфармацыйна-аналітычныя матэрыялы крымінальнага расследавання аб “генацыдзе беларускага народа”, прадастаўленыя Генпракуратурай, паведамляла Мінадукацыі.

У 2023 годзе выдадзены падручнікі “Генацыд беларускага народа ў гады Вялікай Айчыннай вайны”. З 2023 года з’явіліся адпаведныя дапаможнікі асобна для 1–4-х, 5–9-х і 10–11-х класаў.

Пры гэтым беларускія ўлады праводзяць паралель паміж гітлераўцамі і ўдзельнікамі пратэстаў супраць фальсіфікацыі вынікаў прэзідэнцкіх выбараў 2020 года.

Пасол РФ у Мінску Барыс Грызлоў паведаміў 1 лютага аб стварэнні адзіных падручнікаў па гісторыі для школ і ВНУ для Беларусі і Расіі: “Важна, што мы дамовіліся аб тым, што ў нас будуць адзіныя падручнікі па гісторыі як для школ, так і для ВНУ”.