У Лідзе праходзяць трохдзённыя зборы з кіраўнікамі органаў тэраабароны
Удзельнікі збораў тэрытарыяльных войскаў у Барысаве
17 лістапада, Позірк. Зборы са службовымі асобамі органаў упраўлення тэрытарыяльнай абароны пройдуць з 17 па 19 лістапада ў Лідзе (Гродзенская вобласць), паведамляе прэс-служба Міністэрства абароны.
Мерапрыемствам кіруе начальнік упраўлення тэраабароны — намеснік начальніка Генеральнага штаба Узброеных сіл Андрэй Краўчанка.
У рамках збораў, паводле інфармацыі ваеннага ведамства, запланаваныя заняткі з афіцэрамі “па асноўных пытаннях фармавання, падрыхтоўкі і прымянення тэрытарыяльных войскаў з улікам наяўнай абстаноўкі”.
Пасля гэтых збораў будуць падведзеныя “вынікі дзейнасці” органаў кіравання тэраабароны ў 2024/2025 навучальным годзе.
Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.
Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама вайсковымі камісарамі са сталіцы і рэгіёнаў 26 траўня 2023 года ў Гомелі заявіў, што тэрытарыяльная абарона “з сістэмы, якая забяспечвае, трансфармуецца ў паўнавартасную баявую”.
Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Маскву.
