Чарговы этап праверкі боегатоўнасці распачаты на захадзе Беларусі

5 красавіка, Позірк. Аб пачатку чарговага этапа праверкі баявой гатоўнасці Узброеных сіл паведаміла 5 красавіка Міністэрства абароны.

“Танкавыя і інжынерныя воінскія часці і падраздзяленні 6-й асобнай механізаванай брыгады Заходняга аператыўнага камандавання прыводзяцца ў гатоўнасць да выканання задач па прызначэнні”, — гаворыцца ў рэлізе.

Асабістаму складу на штатным узбраенні, ваеннай і спецыяльнай тэхніцы “трэба вылучыцца на палігоны і прызначаныя ўчасткі мясцовасці, дзе з імі будуць праведзены вучэнні і трэніроўкі”.

Узгаданая брыгада дыслакуецца ў Гродне. Наведваючы гэты горад 2 красавіка, Аляксандр Лукашэнка заявіў, што ўлады “рыхтуюцца да вайны”.

26 сакавіка, наведваючы месцы дыслакацыі вайскоўцаў у Ашмянскім раёне (Гродзенская вобласць) Лукашэнка загадаў знішчаць любых парушальнікаў мяжы, заявіўшы, што Беларусь і Расія самі не збіраюцца нападаць на краіны Захаду.

Праверка боегатоўнасці пачалася ва Узброеных сілах 11 сакавіка.