Палітзняволены журналіст Аляксандр Ігнацюк асуджаны на шэсць год калоніі

8 красавіка, Позірк. Суд Столінскага раёна (Брэсцкая вобласць) асудзіў прызнанага палітвязнем журналіста і экс-выдаўца, жыхара Пінска Аляксандра Ігнацюка на шэсць год калоніі ва ўмовах узмоцненага рэжыму, паведамляе 8 красавіка праваабарончы цэнтр “Вясна”.

Журналіста прызналі вінаватым паводле ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), ч. 2 арт. 367 (паклёп у дачыненні да прэзідэнта), ч. 1 і ч. 2 арт. 208 (вымагальніцтва) Крымінальнага кодэксу.

Суддзя Сяргей Насеня, які асудзіў Ігнацюка, таксама прызначыў яму штраф у памеры 200 базавых велічыняў (8 тыс. рублёў) і пастанавіў канфіскаваць ноўтбук як “сродак здзяйснення злачынства”.

Згодна з версіяй абвінавачвання, Ігнацюк у жніўні 2020 года, знаходзячыся на тэрыторыі Столінскага і Пінскага раёнаў, “арганізоўваючы групавыя дзеянні, якія груба парушаюць грамадскі парадак <…> размясціў у сацыяльных сетках публікацыі, якія заклікаюць да групавых дзеянняў, якія груба парушаюць грамадскі парадак і спалучаныя з відавочным непадпарадкаваннем патрабаванням прадстаўнікоў улады”.

Таксама следства сцвярджала, што ён “наўмысна размясціў у сетцы інтэрнэт інфармацыю абразлівага і паклёпніцкага характару ў дачыненні да Аляксандра Лукашэнкі”.

Акрамя гэтага, журналіста абвінавацілі ў вымагальніцтве (арт. 208 КК). Паводле следства, Іганцюк на працягу 2021 і 2022 гадоў “у карыслівых мэтах, жадаючы ўзбагаціцца за кошт іншых грамадзян, <…> неаднаразова вымагаў грашовыя сродкі і іншую маёмасць у прадпрымальнікаў Столінскага раёна”.

На судзе Ігнацюк часткова прызнаў сваю віну паводле ч. 1 арт. 342 і ч. 2 арт. 367, але паводле ч. 1 і 2 арт. 208 КК — не прызнаў. Пры гэтым ён прызнаў заяўленыя іскавыя патрабаванні пацярпелага аб спагнанні маёмаснай шкоды ў памеры 1,8 тыс. рублёў.

11 сакавіка МУС паведаміла пра затрыманне падазраванага ў “вымагальніцтве” і “экстрэмізме” уладальніка ютуб-канала з Пінскага раёна (Брэсцкая вобласць), не назваўшы яго імя. Адзначалася, што гэта 52-гадовы мужчына, “раней судзімы за абразу прадстаўніка ўлады”.

Пазней праваабаронцы высветлілі, што гаворка пра Ігнацюка, які знаходзіцца ў следчым ізалятары з ліпеня 2023 года. Тады заяўлялася, што мужчына затрыманы паводле арт. 361⁴ КК (садзейнічанне экстрэмісцкай дзейнасці).

Да 2003 года Ігнацюк выдаваў незалежную рэгіянальную газету “Вячэрні Столін”, затым быў рэдактарам сайта “Пра Столін”.