Беларускі штангіст Эдуард Зязюлін заваяваў алімпійскую ліцэнзію

11 красавіка, Позірк. Чэмпіён Еўропы, пяціразовы пераможца першынства Беларусі цяжкаатлет Эдуард Зязюлін заваяваў ліцэнзію на ўдзел у парыжскай Алімпіядзе 2024 года, паведамляе прэс-служба Міністэрства спорту і турызму.

На Кубку свету ў тайландскім Пхукеце ён заняў 7-е месца ў катэгорыі больш за 102 кг. З улікам таго, што вызначалася дзесяць удзельнікаў АГ, Зязюлін атрымаў права выступіць у Парыжы.

Раней паведамлялася, што алімпійскія ліцэнзіі заваявалі беларускія штангісты Яўген Ціханцоў (да 102 кг) і Сюзана Валадзько (да 71 кг).

25 сакавіка стала вядома, што беларускія батутысты Іван Літвіновіч і Віялета Бардзілоўская атрымалі ліцэнзіі для ўдзелу ў АГ-2024 у нейтральным статусе.

Паводле падлікаў выдання “Трыбуна”, у беларускіх спартсменаў на 8 красавіка было 17 ліцэнзій на ўдзел у АГ-2024. З іх у барацьбе — 7, плаванні — 3, скачках на батуце і цяжкай атлетыцы — па 2, акадэмічным веславанні, веласпорце і тхэквандо — па 1.

Рашэнні Міжнароднага алімпійскага камітэта чакаюць беларускія лёгкаатлеты з выкананым нарматывам, у шэрагу дысцыплін кваліфікацыя на АГ працягваецца.

28 сакавіка мэр сталіцы Францыі Ан Ідальга падчас візіту ў Кіеў заявіла, што расійскім і беларускім спартсменам “не будуць радыя ў Парыжы”.

Спартсмены з Беларусі і Расіі змогуць пазмагацца за медалі толькі ў статусе індывідуальных нейтральных атлетаў пры ўмове адсутнасці “актыўнай падтрымкі” вайны ва Украіне, а таксама кантракта з вайсковымі або сілавымі ведамствамі Беларусі або РФ.

Таксама будуць забароненыя беларускі і расійскі сцягі, гімны і любое абазначэнне нацыянальнай прыналежнасці.

28 лютага 2022 года, праз некалькі дзён пасля пачатку вайны ва Украіне, МАК заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расійскі і беларускі спорт аказаліся амаль у поўнай ізаляцыі.

25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі з-за яго пашпарта”.

28 сакавіка МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і вайсковымі ведамствамі сваіх краін.

8 снежня 2023 года МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях 2024 года ў Парыжы ў нейтральным статусе. Шэраг адпаведных федэрацый дапусціў беларусаў і расіян да спаборніцтваў пад сваёй эгідай.

Алімпійскія гульні пройдуць у Парыжы 26 ліпеня — 11 жніўня 2024 года.