Мінімальная колькасць адвакатаў у юрыдычных кансультацыях зніжаная паўсюль, акрамя сталіцы і дзвюх абласцей

16 красавіка, Позірк. Мінімальная колькасць адвакатаў у юрыдычных кансультацыях зніжана паўсюдна, акрамя сталіцы, Мінскай і Брэсцкай абласцей, сведчыць праведзены “Позіркам” аналіз пастановы Міністэрства юстыцыі № 16 ад 5 красавіка, апублікаванай на Нацыянальным прававым інтэрнэт-партале 16 красавіка.

У цэлым мінімальная колькасць адвакатаў павялічылася з 1.333 да 1.454, то бок на 8,32%.

У параўнанні з ранейшымі нарматывамі мінімальная колькасць адвакатаў у юрыдычных кансультацыях Мінска павялічылася з 387 да 479. Гэта адбылося за кошт з’яўлення розных спецыялізаваных кансультацый, сярод якіх, напрыклад, “Прававая абарона”, “Суб’ект права”, “Тэхналогіі і права”. Пры гэтым мінімальная колькасць адвакатаў ва ўсіх раёнах сталіцы зараз не перавышае 22. Раней у юрыдычных кансультацыях Заводскага, Партызанскага, Першамайскага, Фрунзенскага раёнаў было мінімум па 25 адвакатаў.

У Мінскай вобласці мінімальная колькасць адвакатаў павялічылася з 268 да 363, у Брэсцкай вобласці — са 131 да 142.

У астатніх абласцях мінімальная колькасць адвакатаў зменшылася: у Віцебскай — 141 (было 159), Гомельскай — 150 (166), Гродзенскай — 98 (105), Магілёўскай — 81 (117). У большасці раёнаў гэтай вобласці мінімальная колькасць адвакатаў — 1.

Павелічэнне мінімальнай колькасці адвакатаў адбылося на фоне рэпрэсій у іх прафесійнай супольнасці.

У Мінску 28 лютага супрацоўнікі Камітэта дзяржбяспекі “зладзілі рэйд на адвакатаў”. Паводле інфармацыі праваабаронцаў, было затрымана сама меней 12 адвакатаў. Большая частка з іх выйшла на волю.

Пасля прэзідэнцкіх выбараў 2020 года ў Беларусі пачаўся сістэматычны ціск на адвакатуру.

Паводле даных ініцыятывы “Права на абарону”, з пачатку 2020 года ў Беларусі колькасць адвакатаў скарацілася з 2.200 да 1.650. Інстытут заканадаўча фактычна пазбавіўся незалежнага ад дзяржавы статусу: з 2021 года адвакаты могуць працаваць толькі пры юрыдычных кансультацыях, загадчыкі якіх прызначаюцца па ўзгадненні з Мінюстам. У 2022 годзе паўнамоцтвы загадчыкаў пашырылі.

Супраць шэрагу адвакатаў былі заведзеныя крымінальныя справы з палітычных матываў. На сёння ў месцах зняволення знаходзіцца шэсць палітвязняў-адвакатаў. Пад пагрозай пераследу некаторыя былі вымушаны пакінуць Беларусь.

Раней Аляксандр Лукашэнка заявіў, што адвакатура павінна знаходзіцца пад кантролем” і “дзейнічаць паводле закона, а не нейкіх прыдуманых норм — свабоды слова і іншых свабод”.