30 верасня, Позірк. Важным складнікам рэгіянальнай інтэграцыі з’яўляецца харчовая бяспека, заявіў Аляксандр Лукашэнка на сустрэчы 30 верасня ў Мінску з кіраўнікамі некаторых краін Садружнасці Незалежных Дзяржаў.
“Не проста развіццё сельскай гаспадаркі, а менавіта харчовая бяспека, — цытуе спікера яго прэс-служба. — Гэта пытанне сацыяльнай стабільнасці і, без перабольшання, існавання народаў і дзяржаў (асабліва сёння, калі амаль мільярд насельніцтва ў свеце галадае)”.
Паводле яго слоў, да такога меркавання ўлады ў Мінску прыйшлі ўжо даўно, а ўведзеныя супраць Беларусі “дзікія санкцыйныя абмежаванні толькі пацвердзілі правільнасць узятага курсу на дасягненне самазабеспячэння па самых крытычных пазіцыях”.
Ён сцвярджае, што “ўсё неабходнае для паспяховай кааперацыі краін у аграпрамысловай сферы маецца”.
Лукашэнка адзначыў, што Беларусь з савецкіх часоў “надае асаблівую ўвагу прамысловасці, асабліва машынабудаванню”: “У гэтай сферы мы бачым сваю спецыялізацыю і, калі хочаце, пакліканне”.
Гаворачы аб сферы цыфравізацыі, прамоўца паскардзіўся, што “супрацоўніцтва ў гэтым кірунку на належным узроўні пакуль няма”. “Пытанне аб прызнанні лічбавага подпісу застаецца неўрэгуляваным ужо доўгія гады. У гэтай галіне дзве задачы: першая — адкрыць узаемны доступ да нацыянальных інфармацыйных сістэм і другая — забяспечыць іх сумяшчальнасць. З Расіяй мы рухаемся ў гэтым плане вельмі прыстойна. У бліжэйшы час мы гэтыя пытанні вырашым. Калі будуць жадаючыя выкарыстоўваць наш досвед — калі ласка”, — сказаў Лукашэнка.
У чатырох з шасці абласцей Беларусі па выніках студзеня — жніўня 2025 года зафіксавана падзенне сельгасвытворчасці, вынікае з праведзенага “Позіркам” аналізу даных Нацыянальнага статыстычнага камітэта.
У Брэсцкай вобласці выпуск паменшыўся на 0,1% (годам раней рост быў 5,9%), Віцебскай — на 1,1% (+9,1%), Мінскай — на 3% (+9,4%), Гродзенскай — на 4% (+6%).
У Гомельскай вобласці вытворчасць вырасла на 5,5% (+6,3%), Магілёўскай — на 7,9% (+5,8%).
Пазыковая нагрузка арганізацый сельскай, лясной і рыбнай гаспадарак Беларусі на пачатак жніўня склала 4 млрд 523,7 млн (+12,7% у гадавым вымярэнні), пратэрмінаваная — 19 млн (рост у 2,1 раза).
Па выніках студзеня — ліпеня 2025 года Беларусь зноў заняла апошняе месца ў Еўразійскім эканамічным саюзе (ЕАЭС) па дынаміцы вытворчасці сельскагаспадарчай прадукцыі, сведчыць праведзенае “Позіркам” параўнанне даных дэпартамента статыстыкі Еўразійскай эканамічнай камісіі (ЕЭК).
Па выніках студзеня — ліпеня 2025 года Беларусь заняла чацвёртае месца ў ЕАЭС)па дынаміцы прамысловай вытворчасці ў параўнанні з аналагічным перыядам 2024-га, сведчыць праведзены “Позіркам” аналіз даных дэпартамента статыстыкі ЕЭК.
Па выніках студзеня краіна займала другое месца, студзеня — лютага, студзеня — сакавіка і студзеня — красавіка — трэцяе, студзеня — траўня і студзеня — чэрвеня — чацвёртае.
Аўтарызавацца
Забыліся пароль?
Выхад з профілю
