Палата прадстаўнікоў ухваліла законапраект аб прыпыненні дзеяння ДЗУСЕ

17 красавіка, Позірк. Праект закона “Аб прыпыненні дзеяння дагавора аб звычайных узброеных сілах у Еўропе (ДЗУСЕ)” прыняты ў адным чытанні 17 красавіка Палатай прадстаўнікоў Нацыянальнага сходу (ПП НС).

Законапраект прадставілі дэпутатам намеснік кіраўніка МЗС Юрый Амбразевіч і старшыня пастаяннай камісіі ПП НС па міжнародных справах Сяргей Рачкоў, паведамляе прэс-служба ніжняй палаты парламента.

“Асабіста я падтрымліваю рашэнне аб прыпыненні ДЗУСЕ. І нават больш жорстка: сам гэты дагавор састарэў. Вёў бы гаворку не пра прыпыненне, а пра выхад”, — сказаў Амбразевіч.

5 красавіка Аляксандр Лукашэнка ўхваліў унясенне ў Палату прадстаўнікоў праекта закона аб прыпыненні дзеяння ДЗУСЕ.

Як адзначала яго прэс-служба, законапраект “прадугледжвае прыпыненне дзеяння ДЗУСЕ, але не азначае выхад Беларусі з яго і спыненне ажыццяўлення ва Узброеных сілах унутраных працэдур, звязаных з яго выкананнем”.

Падкрэслівалася, што “Беларусь у поўным аб’ёме выконвае абавязацельствы па дамове, у тым ліку няўхільна прытрымліваецца ўстаноўленых гранічных узроўняў наяўнасці ўзбраенняў, ваеннай тэхнікі і асабістага складу Узброеных сіл”.

Разам з тым, як удакладнялася, “у жніўні 2022 года Чэхія, а ў сакавіку 2023 года Польшча прынялі рашэнне аб невыкананні дамовы ў дачыненні да Беларусі”, “у лістападзе 2023 года Паўночнаатлантычны савет НАТО зрабіў заяву аб намеры дзяржаў — членаў альянсу, якія ўдзельнічаюць у дамове, прыпыніць яе дзеянне”, “з ДЗУСЕ таксама выйшла і Расійская Федэрацыя”.

“Прыпыненне дзеяння дамовы дзяржавамі — членамі НАТО і іх саюзнікамі фактычна азначае спыненне яе функцыянавання”, — адзначалася ў паведамленні.

16 кастрычніка 2023 года Лукашэнка падпісаў закон, які прыпыняе дзеянне Дамовы аб звычайных узброеных сілах у Еўропе (ДЗУСЕ) у дачыненні да Польшчы і Чэхіі.

На практыцы гэта азначае, што Беларусь зняла з сябе юрыдычнае абавязацельства дапускаць інспектараў з Польшчы і Чэхіі да кантролю за выкананнем ёю колькасных абмежаванняў на звычайныя ўзбраенні і тэхніку, а таксама перадаваць гэтым краінам інфармацыю аб сваім ваенным патэнцыяле. Пасля прыпынення ў Беларусі дзеяння ДЗУСЕ гэта будзе тычыцца і іншых краін.

Падпісаная 19 лістапада 1990 года ДЗУСЕ ўсталявала гранічна дапушчальную колькасць звычайных узбраенняў і тэхнікі для шэрагу краін НАТО і Арганізацыі Варшаўскай дамовы, а таксама механізмы праверкі выканання абавязацельстваў — абмен інфармацыяй і інспекцыі. Пасля распаду СССР яе квоты часткова размеркавалі паміж сабой восем былых саюзных рэспублік.

Беларусь, якая ратыфікавала ДЗУСЕ 21 кастрычніка 1992 года, абавязалася мець не больш за 1.800 танкаў, 2.800 баявых бронемашын, 1.615 артылерыйскіх сістэм, 294 баявых самалётаў і 80 ударных верталётаў. Рэальна ж падобным патэнцыялам яна ніколі не валодала.