На мяжы з Польшчай растуць чэргі пасажырскага транспарту

5 лістапада, Позірк. Чэргі пасажырскага транспарту, які рухаецца з Беларусі ў Польшчу, павялічваюцца, вынікае з аператыўных даных Дзяржаўнага памежнага камітэта (ДПК).

У пункце Брэст (з польскага боку Цярэспаль) на 10:00 5 лістапада выезду чакала 2.845 легкавых аўтамабіляў і 165 аўтобусаў (суткамі раней у гэты ж час — 2.660 і 150 адпаведна).

У пункце Казловічы (Кукурыкі) у чарзе знаходзілася 1.640 грузавікоў (1.770).

У пункце пропуску Грыгараўшчына (з латвійскага боку Патэрніекі) на ўказаны час было 390 грузавых аўтамабіляў (450). Аўтобусы і легкавыя аўтамабілі адсутнічалі як у 10:00 5 лістапада, так і ў аналагічны час 4-га.

Нягледзячы на закрытую мяжу, захоўваюцца чэргі грузавых аўтамабіляў на мяжы з Літвой. На 10:00 5 лістапада ў пункце Каменны Лог (Мядзінінкай) было 830 адзінак гэтага транспарту, у Беняконях (Шальчынінкай) — 430.

Усе пункты пропуску на беларуска-літоўскай мяжы будуць закрытыя на працягу месяца — такое рашэнне прынята на пасяджэнні ўрада балтыйскай краіны 29 кастрычніка ў сувязі з масавымі залётамі з Беларусі метэазондаў з кантрабанднымі цыгарэтамі. Магчыма падаўжэнне абмежаванняў пасля 30 лістапада.

Познім вечарам 26 кастрычніка Літва закрыла мяжу з Беларуссю на нявызначаны тэрмін, такім чынам, цяпер тэрмін падоўжаны да канца восені.

Да гэтага Літва закрывала мяжу некалькі разоў. Прычынай сталі паветраныя шары з кантрабанднымі цыгарэтамі, якія ў тым ліку пагражалі працы аэрапорта ў Вільнюсе. Упершыню мяжа была закрытая ў ноч на 22 кастрычніка.

Аляксандр Лукашэнка 31 кастрычніка заявіў, што літоўцы “самі з тэрыторыі Беларусі перакідвалі цыгарэты на метэаралагічных зондах”, каб зарабіць на перапродажы.