Распачата спецвытворчасць у дачыненні да футбольнага фаната з Мінска Юрыя Качуры

19 красавіка, Позірк. Следчы камітэт 18 красавіка распачаў спецыяльную вытворчасць у дачыненні да 44-гадовага Юрыя Качуры, вынікае з адпаведнага пераліку на сайце ведамства.

Мужчыну загадана з’явіцца ва УСК па Мінскай вобласці. Яму інкрымінаваныя ч. 1 арт. 130 (распальванне <…> варожасці або варажнечы) і арт. 369 (абраза прадстаўніка ўлады) Крымінальнага кодэкса.

Качура — футбольны фанат, працаваў абвальшчыкам мяса, жыў у Мінску.

Паводле інфармацыі ініцыятывы “Праваабаронцы супраць катаванняў”, у кастрычніку 2020 года яго “схапілі на вуліцы без якіх-небудзь падстаў”.

“На Акрэсціна (сталічны комплекс ізалятараў у 1-м зав. Акрэсціна. — “Позірк”.) яго чакалі катаванні, абліванне хлоркай, рэгулярныя пабоі, а пасля — немагчымасць уладкавацца на працу, — адзначае ініцыятыва. — Праз некалькі месяцаў яго затрымалі зноў. На гэты раз ГУБАЗіК вынес дзверы суседу, пасля кінуўшы ў яго кватэру шумавую гранату. Пасля пачаліся збіванні”.

У інтэрв’ю праваабаронцам Качура паведаміў, што пасля вызвалення выехаў у Вільнюс.

Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая, па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.