23 кастрычніка, Позірк. Аб выхадзе на свабоду медыяменеджара Канстанціна Залатых паведамляе Беларуская асацыяцыя журналістаў.
Адзначаецца, што ён цалкам адбыў тэрмін зняволення.
Дырэктар недзяржаўнай газеты “Беларусы і рынак” 6 красавіка 2023 года быў прыгавораны да 4 гадоў пазбаўлення волі Мінскім гарадскім судом. Прызнаны вінаватым паводле ч. 2 арт. 426 (перавышэнне ўлады або службовых паўнамоцтваў), ч. 2 арт. 130 (распальванне расавай, нацыянальнай, рэлігійнай альбо іншай сацыяльнай варожасці або варажнечы), ч. 1 арт. 368 (абраза прэзідэнта) і арт. 369 (абраза прадстаўніка ўлады) Крымінальнага кодэкса.
Мужчына знаходзіўся ў няволі з 18 траўня 2022 года. Праваабаронцы прызналі яго палітвязнем.
Паводле звестак БАЖ, у няволі цяпер знаходзіцца 29 прадстаўнікоў СМІ.
