Аргкамітэт БХД адхрысціўся ад хрысціянскіх дэмакратаў, якія балатуюцца ў КР па спісе “Салідарнасць”
Сцяг БХД
23 красавіка, Позірк. На фоне ўдзелу групы хрысціянскіх дэмакратаў пад лідарствам Георгія Дзмітрука ў выбарах у Каардынацыйную раду аргкамітэт па стварэнні партыі “Беларуская хрысціянская дэмакратыя” (БХД) у чарговы раз заявіў, што той “ніякага дачынення да БХД не мае”.
“Георгій Дзмітрук, які спрабуе выступаць нібыта ад імя беларускіх хрысціянскіх дэмакратаў, не мае ніякага дачынення да дзейнасці і працы хрысціянскай дэмакратыі, паколькі быў выключаны з аргкамітэта БХД”, — гаворыцца ў заяве на сайце палітычнай структуры.
Аргкамітэт заявіў, што БХД не ўдзельнічае ў выбарах у Каардынацыйную раду — “зыходзячы з ранейшых рашэнняў і сучасных палітычных варункаў”. Разам з тым, адзначана ў заяве, “хрысціянскія дэмакраты могуць браць удзел у выбарах у КР асабіста, <…> фармуючы ўласныя выбарчыя спісы, пры гэтым не прадстаўляючыся Партыяй Беларуская Хрысціянская Дэмакратыя”.
“Нагадаем, большасць членаў аргкамітэта БХД застаецца ў Беларусі. Многія хрысціянскія дэмакраты, уключаючы [сустаршыню] Паўла Севярынца, з’яўляюцца палітвязнямі”, — адзначана ў дакуменце. Пры гэтым, на думку аргкамітэта, дзеянні Дзмітрука ствараюць для палітзняволеных аднадумцаў “дадатковую пагрозу”.
19 красавіка партыя “Народная Грамада” (даўно ліквідаваная ў Беларусі, але мае міжнароднае прызнанне) і група хрысціянскіх дэмакратаў на чале з Дзмітруком абвясціла пра ўдзел у выбарах у КР адзіным спісам “Салідарнасць”.
Выбары ў Каардынацыйную раду трэцяга склікання пройдуць 25–28 траўня.
Апошняя дата рэгістрацыі кандыдатаў — 22 красавіка. З 25 красавіка па 25 траўня пройдзе перыяд агітацыі.
Сярод беларускіх хрысціянскіх дэмакратаў адбыўся раскол
12 лютага, Позірк. Паводле інфармацыі "Радыё Свабода", 10 лютага ў Варшаве адбыўся сход часткі актыву "Беларускай хрысціянскай дэмакратыі" (БХД), якая прызнала адзіным лідарам БХД палітзняволенага Паўла Севярынца. Пры гэтым разам з Севярынцам, як заяўлена, сустаршынёй БХД Стаў Георгій Дзмітрук. Сход …
