Прэзідэнт Еўрапарламента: Беларусь не стане забытым кутком Еўропы

3 траўня, Позірк. “Моцным сігналам” рашучасці “ўмацоўваць сувязі і дэманстраваць падтрымку” назвала прэзідэнт Еўрапейскага парламента Раберта Метсола пагадненне аб супрацоўніцтве ЕП і беларускіх дэмакратычных сіл, падпісанае 3 траўня на Мальце ў рамках візіту дэмакратычнага лідара Святланы Ціханоўскай.

Як адзначае прэс-служба ЕП, гэта таксама “знак цвёрдай прыхільнасці парламента развіццю супрацоўніцтва з дэмакратычнымі сіламі і грамадзянскай супольнасцю Беларусі ў іх барацьбе за свабодную, незалежную і дэмакратычную краіну”.

Дакумент быў падпісаны ў развіццё рэзалюцыі Еўрапарламента ад 13 верасня 2023 года.

У адпаведнасці з пагадненнем ЕП “імкнецца працягваць маніторынг унутранай сітуацыі ў Беларусі, у прыватнасці парушэнняў правоў чалавека, становішча палітвязняў і іншых асоб, якія пераследуюцца па палітычных матывах, журналістаў, праваабаронцаў, прафсаюзных актывістаў, меншасцяў і няўрадавых арганізацый, спробаў рэжыму легітымізаваць сябе, у тым ліку шляхам фіктыўных выбараў, удзелу рэжыму ў неапраўданай агрэсіўнай вайне і ваенных злачынствах Расіі супраць Украіны; пагроз, якія зыходзяць ад рэжыму Лукашэнкі на адрас ЕС, і мер, накіраваных на падрыў правоў і свабод беларусаў за мяжой”.

Бакі працягнуць патрабаваць прыцягнення рэжыму да адказнасці за грубыя парушэнні правоў чалавека, злачынствы супраць чалавечнасці, саўдзел у ваенных злачынствах і агрэсіі супраць Украіны.

Група па падтрымцы дэмакратыі і каардынацыі выбараў Еўрапарламента будзе “садзейнічаць умацаванню патэнцыялу і тэхнічнай экспертызы КР і АПК з мэтай садзейнічання дэмакратычнаму транзіту ў краіне і падтрымання незалежнасці і суверэнітэту Беларусі”, дапамагаць у “стратэгічных камунікацыях”, падтрымліваць праваабаронцаў, незалежных журналістаў, працягваць намаганні па забеспячэнні вызвалення палітвязняў.