Лаўрэат прэміі Карла Вялікага Гольдшміт падтрымаў беларускіх палітвязняў

9 траўня, Позірк. У падтрымку беларускіх палітвязняў выказаўся старшыня Канферэнцыі еўрапейскіх рабінаў (КЕР) Пінхас Гольдшміт 9 траўня ў нямецкім горадзе Аахен, прымаючы Міжнародную прэмію Карла Вялікага, паведаміў “Позірку” галоўны дарадца Святланы Ціханоўскай Франак Вячорка.

Беларускі дэмакратычны лідар, а таксама яе паплечніца па аб’яднаным штабе на прэзідэнцкіх выбарах 2020 года Вераніка Цапкала прысутнічалі на цырымоніі ўручэння прэміі на правах лаўрэатаў пазамінулага года. Яшчэ адну прадстаўніцу штаба, якая падзяліла з імі ў той год прэмію, палітзняволеную Марыю Калеснікаву, прадстаўляла яе сястра Таццяна Хоміч.

Паводле слоў Вячоркі, Гольдшміт падчас выступу “згадаў Беларусь, назваў Ціханоўскую абраным прэзідэнтам”, падтрымаў барацьбу беларусаў за сваю свабоду.

На 9 траўня ў Беларусі 1.375 чалавек, якіх праваабарончая супольнасць прызнае палітвязнямі. Рэальная колькасць рэпрэсаваных у той ці іншай форме з палітычных матываў значна большая.

Прэмія імя Карла Вялікага — адна з найбольш значных еўрапейскіх узнагарод. Яна ўручаецца з 1950 года людзям і арганізацыям за іх вядучую ролю ў аб’яднанні Еўропы. У 2019 годзе прэмія была ўручана генеральнаму сакратару ААН Антонію Гутэрышу, за год да гэтага — прэзідэнту Францыі Эманюэлю Макрону, у 2017-м узнагароду атрымаў брытанскі гісторык Цімаці Гартан-Эш, а ў 2016-м — папа рымскі Францішак.

Прэміяй у свой час былі ўганараваныя кароль Іспаніі Хуан Карлас I, папа рымскі Ян Павел II, вярхоўны прадстаўнік ЕС па знешняй палітыцы і бяспецы Хаўер Салана, канцлер ФРГ Ангела Меркель, старшыня Еўрапейскага савета Херман Ван Рампёй.

Падрабязнасці даступныя падпісчыкам “Позірк+”