15 траўня, Позірк. Беларускі ПЭН далучыўся да заявы PEN International з асуджэннем прынятага ў Грузіі закона аб “празрыстасці замежнага ўплыву”, паведамляецца на старонцы арганізаціі.
Паводле заявы, прыняты закон вытрыманы “ў расійскім стылі”, яго зацвярджэнне парламентам “азмрочылася паліцэйскім гвалтам і жорсткімі нападамі невядомых на мірных дэманстрантаў”.
“Усе вінаватыя ў незаконным ужыванні сілы і гвалтоўных нападах на пратэстоўцаў павінны быць прыцягнутыя да адказнасці, а рэпрэсіўнае заканадаўства тэрмінова адмененае”, — адзначылі ў арганізацыі.
Масавыя пратэсты супраць закону, гаворыцца ў заяве, “сутыкнуліся з прымяненнем сілы паліцыяй, што прывяло да раненняў сярод пратэстоўцаў і дзесяткаў неабгрунтаваных арыштаў”, а таксама “да гвалтоўных нападаў невядомых на заўважных крытыкаў урада, якія выглядаюць скаардынаванай кампаніяй”.
Сцвярджаецца, што больш за 30 журналістаў, якія асвятлялі акцыі пратэсту, а таксама “сотні крытыкаў закону”, атрымалі “ананімныя тэлефонныя званкі з пагрозамі ў апошнія дні”.
Дэмакратычны лідар Святлана Ціханоўская на сваёй старонцы ў сацсетцы X 12 траўня падтрымала грамадзян Грузіі, якія пратэстуюць супраць прыняцця ўрадам закона аб “празрыстасці замежнага ўплыву”.
“Маё сэрца з народам Грузіі, — напісала палітык. — Гвалт у дачыненні да мірных дэманстрантаў абсалютна непрымальны”.
На думку Ціханоўскай, народы Грузіі, Беларусі, Украіны, Малдовы і Арменіі заслугоўваюць будучыні ў складзе Еўрасаюза.
14 траўня парламент Грузіі ўхваліў у трэцім чытанні законапраект “Аб празрыстасці замежнага уплыву”. Разгляд дакумента дэпутатамі пачаўся 15 красавіка.
Законапраект ініцыяваны кіруючай партыяй “Грузінская мара”, ён прадугледжвае стварэнне рэестра арганізацый (НКА, СМІ і інш.), якія фінансуюцца з-за мяжы больш чым на 20%. Іх абавяжуць публікаваць гадавую фінансавую справаздачу.
Апазіцыйныя партыі і значная частка грамадства лічаць, што закон накіраваны на ўшчамленне палітычных і грамадзянскіх свабод у краіне. У незалежных медыя і сацсетках дакумент называюць “рускім законам” і “законам аб замежных агентах”. На думку яго праціўнікаў, дзеянне закона будзе аналагічным расійскаму, з дапамогай якога Крэмль пераследуе сваіх апанентаў.
Таксама заяўляецца, што гэта пазбавіць Грузію перспектывы ўступлення ў Еўрасаюз. Цяпер гэтая краіна мае статус кандыдата ў ЕС.
