МПЗ абавязала банкі прадастаўляць звесткі аб фізічных асобах з вялікімі даходамі
23 траўня, Позірк. Банкі, якія працуюць у Беларусі, да 1 верасня павінны падаць у фіскальныя органы звесткі аб фізасобах з прыбыткам больш за 150 тыс. рублёў за 2023 год, вынікае з пастановы Міністэрства падаткаў і збораў № 16 ад 30 красавіка.
Інструкцыя да дакумента апублікаваная 23 траўня на Нацыянальным прававым інтэрнэт-партале.
Прадугледжваецца, што з наступнага года даваць справаздачу неабходна будзе “не пазней за 1 сакавіка каляндарнага года, наступнага за мінулым”.
Сума на рахунках у замежнай валюце будзе пералічвацца ў беларускія рублі па афіцыйным курсе Нацыянальнага банка на дату здзяйснення прыходнай аперацыі.
У дакуменце пазначана, што ў суму не будуць уключацца сродкі, якія паступілі на рахунак, звязаныя з адменай раней учыненых аперацый пры выкарыстанні банкаўскіх картак або вяртаннем грошай па такіх транзакцыях; налічанымі банкам працэнтамі згодна з умовамі заключаных дагавораў; прадастаўленнем авердрафтнага крэдыту, крэдыту шляхам залічэння на бягучы рахунак фізасобы, неўрэгуляваным астаткам запазычанасці кліента.
У інфармацыі аб фізічных асоб банкі павінны будуць пазначыць даныя па 15 пунктах: банкаўскі ідэнтыфікацыйны код, нумар асабовага рахунка кліента, код валюты рахунка кліента, дата адкрыцця і закрыцця рахунка, прозвішча, імя, імя па бацьку, код, серыя і нумар дакумента, які сведчыць асобу, грамадзянства фізасобы, а таксама год, за які прадстаўляюцца звесткі.
Каментуючы ў верасні 2023 года ўказ Аляксандра Лукашэнкі № 269 ад 29 жніўня “Аб мерах па супрацьдзеянні несанкцыянаваным плацежным аперацыям” дэмакратычны лідар Святлана Ціханоўская адзначыла, што гэты дакумент “дае сілавікам доступ да банкаўскай таямніцы і легалізуе поўны кантроль сродкаў беларусаў”.
На яе думку, гэта”развязвае рэжыму рукі рабіць усё, што заўгодна: і са сродкамі на рахунку, і з самім лікам, і з яго ўладальнікам”.
Ціханоўская выказала меркаванне, што банкі, маючы права на таямніцу, “заставаліся маленькім астраўком фінансавай надзейнасці ўнутры хаосу, што разводзіць рэжым”, таму людзі захоўвалі там свае грошы. Аднак “дзяржава зноў мяняе правілы гульні, і ад стабільнасці не застанецца і следу”.
Згаданы ўказ абавязвае Нацбанк наладзіць “узаемадзеянне паміж праваахоўнымі органамі і пастаўшчыкамі плацежных паслуг па абмене інфармацыяй аб несанкцыянаваных плацежных аперацыях і спробах іх здзяйснення”. Генеральная пракуратура, Камітэт дзяржаўнай бяспекі, Следчы камітэт і Міністэрства ўнутраных спраў надзяляюцца правам прыпыняць на тэрмін да 10 дзён расходныя аперацыі па банкаўскіх рахунках, дэпазітах і электронных кашальках для карыстальнікаў, у дачыненні да якіх “маецца інфармацыя (падазрэнне), якая сведчыць аб яго ўдзеле ў здзяйсненні супрацьпраўных дзеянняў”.
У рамках барацьбы з іншадумствам грамадзян масава прыцягваюць да адказнасці за ахвяраванні ў фонды салідарнасці, а плацяжы “пад уплывам падману з боку трэціх асоб” згадваюцца на фоне актыўнасці тэлефонных махляроў, якія, прадстаўляючыся банкаўскімі работнікамі або супрацоўнікамі сілавых ведамстваў, выманьваюць грошы, перш за ўсё ў людзей старэйшага ўзросту.