Дыпламат Шпакоўскі прачытаў у Маскве лекцыю аб “мілітарысцкіх амбіцыях Польшчы”
24 траўня, Позірк. З лекцыяй “Рэспубліка Польшча ў ваенна-палітычным ландшафце Усходняй Еўропы” перад слухачамі Цэнтра дадатковай адукацыі Інстытута права і нацыянальнай бяспекі Расійскай акадэміі народнай гаспадаркі і дзяржаўнай службы выступіў саветнік-пасланнік пасольства Беларусі ў РФ Аляксандр Шпакоўскі, паведамляе дыпмісія.
Ён “акцэнтаваў увагу на пагрозах для бяспекі Беларусі і Расіі, якія зыходзяць ад мілітарысцкіх амбіцый Польшчы, а таксама на сумесных дзеяннях Мінска і Масквы па забеспячэнні абараназдольнасці Саюзнай дзяржавы”.
Шпакоўскі сцвярджае, што Беларусь размясціла расійскую тактычную ядзерную зброю на сваёй тэрыторыі ў якасці “вымушанай меру прэвентыўнага стрымлівання” і “асіметрычнага адказу на безразважныя дзеянні суседніх дзяржаў і блока НАТО па нагнятанні напружанасці ў міжнародных адносінах”.
Беларусь “вывучае вопыт СВА ва Украіне ў кантэксце ўласнага ваеннага планавання, аднак не адступае ад прынцыпаў міралюбівай знешняй палітыкі і не мае намеру ўцягвацца ў гонку ўзбраенняў, што навязваецца Захадам”, заявіў ён.
“Ваенна-стратэгічнае значэнне “беларускага балкона” для інтарэсаў Расіі з’яўляецца несумненным, што абумоўлівае асаблівы характар саюзніцкіх адносін у абароннай сферы”, — сказаў дзеяч.
40-гадовы Шпакоўскі — праўладны прапагандыст, пазіцыянуе сябе як палітолага.
Скончыў Беларускі дзяржаўны педагагічны ўніверсітэт (гістарычны факультэт) і Беларускі дзяржаўны ўніверсітэт (юрыдычны факультэт). Быў апазіцыйным актывістам, у 2006 годзе падчас выбараў — адным з ахоўнікаў кандыдата ў прэзідэнты Аляксандра Мілінкевіча.
Потым працаваў у дзяржорганах, як актывіст выступаў супраць легалізацыі наркотыкаў. Стаў трансліраваць праўладныя і прарасійскія тэзісы. Стварыў і ўзначаліў інфармацыйна-асветніцкую ўстанову “Актуальная канцэпцыя”.
У 2016 годзе з аднадумцамі суправаджаў лідэраў італьянскай неафашысцкай партыі “Новая сіла” Раберта Фіёры і праварадыкальнай Брытанскай нацыянальнай партыі Ніка Грыфіна, якія прыехалі ў Мінск.
Сябра вышэйшай палітрады праўладнай Беларускай партыі “Белая Русь”. На сёння ўнесены ў санкцыйныя спісы Украіны і Польшчы.
У верасні 2023 года назначаны саветнікам-пасланнікам пасольства Беларусі ў РФ. Актыўна каментаваў узаемадзеянне афіцыйнага Мінска з анэксаваным Крымам.
Па выніках парламенцкіх выбараў 25 лютага стаў дэпутатам Палаты прадстаўнікоў (Мінск, 95-я Свіслацкая акруга).
Тэрмінам “спецыяльная ваенная аперацыя (СВА)” расійскія і беларускія ўлады называюць поўнамаштабную вайну, якая вядзе РФ супраць Украіны пры падтрымцы афіцыйнага Мінска.
Дыпламат-прапагандыст Шпакоўскі распавёў студэнтам з “лнр” пра геапалітычныя працэсы
23 красавіка, Позірк. Сустрэчу са "студэнтамі-міжнароднікамі і выкладчыкамі Луганскага педагагічнага ўніверсітэта" правёў саветнік-пасланнік амбасады Беларусі ў РФ, вядомы праўладны прапагандыст Аляксандр Шпакоўскі ў дыпмісіі. Ён "распавёў ⟨…⟩ аб асноўных прынцыпах знешняй палітыкі Рэспублікі Беларусь, узаемадзеянні нашай краіны з Расіяй на …
