Азараў не будзе здымацца з выбараў у КР — ByPol

24 траўня, Позірк. Лідар спісу “Закон і правапарадак” на выбарах у Каардынацыйную раду (КР) Аляксандр Азараў адпрэчыў вылучаны яму выбарчай камісіяй ультыматум.

У тэлеграм-канале аб’яднання былых сілавікоў ByPol паведамляецца, што “каманда “Закон і правапарадак” правяла нараду і большасцю галасоў прыняла рашэнне падтрымаць Аляксандра Азарава і пакінуць яго ў спісе”.

Тамсама адзначаецца, што “рашэнне камісіі па сваім змесце з’яўляецца ультыматумам, прад’яўленым лідэру выбарчага спісу”.

“Такі ультыматум ставіць у залежнасць ад рашэння лідэра выбарчага спісу рэалізацыю права і магчымасці астатніх удзельнікаў спісу быць абранымі, што відавочна не адпавядае стандартам дэмакратычных выбараў”, — гаворыцца ў заяве.

Таксама сцвярджаецца, што “палажэнне аб выбарах у КР не прадугледжвае выдаленне выбарчага суб’екта з прычыны рассылання чат-бота плана “Перамога” і невыканання правілаў бяспекі выбаршчыкаў”.

Сябры выбарчай камісіі не растлумачылі, у адпаведнасці з якімі правіламі яны прынялі такое рашэнне, якія канкрэтна правілы парушыў Азараў, у чым заключаецца гэта парушэнне і не падалі ніякага юрыдычнага абгрунтавання, лічаць аўтары.

Рашэнне “было прынята на эмоцыях у адпаведнасці з асабістым меркаваннем і прэтэнзіямі да Аляксандра Азарава”, лічаць у кааліцыі.

23 траўня падчас анлайн-паседжання камісія па выбарах у Каардынацыйную раду прыняла рашэнне даць кіраўніку арганізацыі былых сілавікоў ByPol Аляксандру Азарава час да 9:00 па цэнтральнаеўрапейскім часе 24 траўня (10:00 па мінскім часе) для рашэння аб яго далейшым удзеле ў выбарах з сябрамі кааліцыі “Закон і правапарадак”, пасля чаго выбаркам будзе галасаваць аб далейшым удзеле кааліцыі ў выбарах.

Выбаркам прызнаў факты парушэння бяспекі грамадзян Беларусі і права беларусаў на атрыманне інфармацыі, а таксама этычных і камунікатыўных норм палажэння аб выбарах у КР у выніку яго дзеянняў.

Азараў выказаў сваю нязгоду з фармулёўкай камісіі аб парушэннях і заявіў, што скаргі на рассылку з заклікам прыняць удзел у выбарах у КР праз чат-бот плана “Перамога” “хутчэй за ўсё, напісаны супрацоўнікамі КДБ”.

“Вы правяралі рэальнасць гэтых скаргаў, што гэта сапраўды верыфікаваны чалавек? — сказаў Азараў. — Спецслужбы працуюць над выдаленнем мяне з выбараў. Яны ўсё пішуць вам пад выглядам грамадзян”.

“У нас ёсць сілы, якія не жадаюць, каб праводзіліся выбары ў КР. Бо выбары ў КР амаль не асвятляюцца ў СМІ. Бо мы рабілі рассылку нашых агітацыйных матэрыялаў і ролікаў у беларускія СМІ — і ўсе адмаўляліся іх публікаваць. Яны казалі: “Мы не займаемся выбарамі”. Давайце нам толькі навіны. Мы зрабілі гэтую рассылку, каб папулярызаваць выбары. Кожны беларус цяпер ведае пра гэтыя выбары”, — заявіў Азараў.

У каментары “Позірку” 23 траўня Азараў пацвердзіў, што пасля названай рассылкі па ініцыятыве дэмакратычнага лідэра Святланы Ціханоўскай ён пазбаўлены доступу да чат-боту. Аднак, паводле яго слоў, зараз з Ціханоўскай вядуцца перамовы аб аднаўленні доступу.

Рассылка з’яўляецца “руцінным працэсам” у дзейнасці ByPol, па меры неабходнасці яна ажыццяўляецца “прыкладна два разы на месяц” пасля заснавання плана “Перамога” ў траўні 2021 года, адзначыў кіраўнік аб’яднання.

У ноч на 22 траўня ўсе, хто актываваў чат-бот плана “Перамога”, атрымалі паведамленні з заклікам узяць удзел у выбарах у КР 25–27 траўня і галасаваць за згаданы спіс.

На праўладных тэлеграм-каналах з’явіліся паведамленні пра затрыманні яе атрымальнікаў, якія нібыта адбыліся пасля атрымання гэтай рассылкі, якім можа пагражаць крымінальная адказнасць за ўдзел у дзейнасці экстрэмісцкага фарміравання.

Выбары ў КР пачынаюцца 25 траўня і працягнуцца да 23:59 27 траўня.