Эканамічны суд Мінска аштрафаваў А1 за завышаныя цэны
29 траўня, Позірк. Эканамічны суд Мінска аштрафаваў кампанію А1 (экс-Velcom) за завышаныя кошты на паслугі мабільнай сувязі, паведамляе прэс-служба Міністэрства антыманапольнага рэгулявання і гандлю (МАРГ).
А1 абвінавацілі паводле ч. 3 арт. 13.2 КаАП (парушэнне ўстаноўленага парадку ўстанаўлення (фарміравання) і (або) прымянення цэн (тарыфаў)).
Адзначаецца, што кампаніі прызначаны штраф у памеры “5% ад кошту рэалізаваных паслуг”. Сума не называецца.
У ходзе правядзення праверкі, гаворыцца ў паведамленні МАРГ, “устаноўленыя парушэнні заканадаўства аб цэнах і цэнаўтварэнні ў частцы адсутнасці эканамічных разлікаў, якія пацвярджаюць узровень устаноўленых на паслугі сотавай рухомай электрасувязі тарыфаў”.
За названыя парушэнні аштрафаваная таксама адказная службовая асоба — на 12 базавых велічынь (480 рублёў).
З лістапада 2007 года беларускім аператарам Velcom (рэбрэндынг на А1 адбыўся ў 2019 годзе) валодае аўстрыйская кампанія Telekom Austria Group, адзін з вядучых тэлекамунікацыйных правайдэраў у Цэнтральнай і Усходняй Еўропе.
24 кастрычніка 2022 прэс-сакратар А1 Мікалай Брэдзелеў асуджаны закрытым судом на чатыры гады пазбаўлення волі. Мужчыну прызналі вінаватым паводле арт. 3612 КК (фінансаванне дзейнасці экстрэмісцкага фарміравання). Пасля затрымання Брэдзелева былі апублікаваныя зроблены ў міліцыі відэазапіс з яго удзелам, а таксама фота прыватнага характару.
На той момант пасол Аўстрыі Алаізія Вергетэр выказала пратэст супраць “парушэння асабістых правоў” Брэдзелева і сустрэлася з яго маці, сваёй сяброўкай. З заявай у абарону прэс-сакратара выступала Telekom Austria Group.
