Экс-кіраўнік мангольскай дзяржавы: Лукашэнка — самазванец, сапраўдны прэзідэнт —Ціханоўская

4 чэрвеня, Позірк. “Беларускі дыктатар [Аляксандр] Лукашэнка, які прыбыў у Манголію, з’яўляецца самазванцам і не прадстаўляе беларускі народ”, — заявіў Цахіягійн Элбэгдорж, які ўзначальваў мангольскую дзяржаву ў 2009–2017 гадах.

“Сапраўдным прэзідэнтам, прызнаным міжнароднай супольнасцю, з’яўляецца Святлана Ціханоўская. Яна заслугоўвае нашай поўнай падтрымкі”, — напісаў палітык на сваёй старонцы ў сацыяльнай сетцы Х.

На яго думку, сустрэча з Лукашэнкам “толькі ганебна легітымізуе вайну і тэрор яго рэжыму”. “Яму месца ў турме, а не ва ўладзе”, — перакананы Цахіягійн Элбэгдорж.

Беларускі дэмакратычны лідар Святлана Ціханоўская ў адказ назвала экс-прэзідэнта Манголіі “сусветным абаронцам дэмакратыі, свабоды і справядлівасці”. “Мы павінны дакладна заявіць, што ўяўляе сабой дыктатар Лукашэнка: ён злачынец і павінен сядзець за кратамі”, — дадала яна.

31 траўня, напярэдадні візіту Лукашэнкі, Цахіягійн Элбэгдорж заклікаў цяперашнія ўлады дзяржавы арыштаваць візіцёра, які “здзейсніў злачынствы супраць чалавечнасці”. Гэта, на яго думку, палепшыла б імідж краіны.

3 чэрвеня ва Улан-Батары затрымалі не менш як чатырох актывістаў руху “Не вайне”, якія выйшлі на пратэст супраць візіту Лукашэнкі. Іх пратрымалі ў паліцэйскім участку каля дзвюх з паловай гадзін.

Лукашэнка наведвае Манголію 1–4 чэрвеня. Ва Улан-Батары яго прынялі прэзідэнт краіны Ухнаагійн Хурэлсух, старшыня Вялікага дзяржаўнага хурала Гамбажавін Занданшатар. З кіраўніком мангольскай дзяржавы беларускі госць падпісаў дагавор аб дружалюбных стасунках і супрацы.

Падпісаны мемарандум аб узаемаразуменні паміж Міністэрствам юстыцыі і ўнутраных спраў Манголіі і Міністэрствам транспарту і камунікацый Беларусі аб узаемным прызнанні і абмене пасведчанняў кіроўцы, міжурадавае пагадненне аб узаемным прызнанні дакументаў аб адукацыі і дарожная карта супрацы профільных міністэрстваў на 2024–2026 гады, дарожная карта супрацоўніцтва ў галіне сельскай гаспадаркі ды інш.