Пытанне абароны мяжы з Беларуссю — задача ўсяго ЕС, лічыць Туск

19 чэрвеня, Позірк. У Еўрасаюзе ніхто не мае сумневаў у тым, што пытанне абароны знешніх межаў — не праблема адной дзяржавы, а задача і выклік для ўсяго ЕС, заявіў прэм’ер-міністр Польшчы Дональд Туск па выніках нефармальнага саміту аб’яднання, які прайшоў 18 чэрвеня ў Бруселі.

“Гэта ў прыватнасці тычыцца мяжы Польшчы з Беларуссю”, — цытуе чыноўніка tvp.info.

Польскі прэм’ер заявіў, што іншыя краіны ЕС, у тым ліку краіны Балтыі, “хутчэй за ўсё, далучацца ў бліжэйшыя дні” да ініцыятывы Варшавы па ўсходняй мяжы — праграме “Шчыт Усход”.

“Маецца палітычны кансэнсус, што мяжа, асабліва мяжа Польшчы з Беларуссю, з’яўляецца еўрапейскай мяжой, — сказаў ён. — Пакуль ніякіх высноў з гэтага зроблена не было. Я размаўляў з большасцю еўрапейскіх прэм’ер-міністраў і прэзідэнтаў менавіта наконт гэтага, і кожны з іх без выключэння пацвердзіў гатоўнасць разглядаць інвестыцыі ў абарону ўсходняй мяжы Еўропы”.

“Еўропа заплаціць за нашу бяспеку, таму што наша бяспека на мяжы — гэта еўрапейская бяспека”, — дадаў Туск.

“Шчыт Усход” з’яўляецца найбуйнейшай праграмай па ўмацаванні ўсходняй мяжы, пачынаючы з 1945 года, а таксама “стратэгічнай аперацыяй у імя бяспекі Польшчы”, заявіў 27 траўня на прэс-канферэнцыі ў Варшаве міністр нацабароны Польшчы Уладзіслаў Касіняк-Камыш.

Паводле яго слоў, праграма “ўзгадняецца з планамі НАТО па стрымліванні і абароне”, і Еўрасаюз “павінен узяць фінансавы ўдзел у пабудове бяспекі”.

Задача праграмы, заявіў чыноўнік, заключаецца ў “перашкодзе перамяшчэнню войскаў праціўніка, аблягчэнні перамяшчэння ўласных войскаў, абароне насельніцтва і гарантаванні максімальнай бяспекі польскіх Узброеных сіл”.

Намеснік міністра нацыянальнай абароны Польшчы Цэзары Томчык паведаміў, што праектам прадугледжана гарантаванне бяспекі каля 700 км мяжы, у тым ліку 400 км мяжы з Беларуссю. Завяршыць гэты праект, паводле яго слоў, ваеннае ведамства плануе да 2028 года.

Першыя інвестыцыі ў праграму “Шчыт Усход”, дадаў намеснік міністра нацабароны, чакаюцца ў першым квартале 2025 года.

18 траўня ў Кракаве Туск паведаміў, што ўрад Польшчы выдзяляе 10 млрд злотых (2,54 млрд долараў) у межах новай праграмы “Шчыт Усход” на ўмацаванне мяжы з Беларуссю і Расіяй. “Мы ўжо пачалі працу, каб польская мяжа была бяспечнай у мірны час і непраходнай для ворага — у ваенны”, — заявіў кіраўнік урада.