Першыя інвестыцыі ў новую польскую праграму па абароне мяжы з Беларуссю і РФ чакаюцца ў 2025 годзе

27 траўня, Позірк. “Шчыт Усход” з’яўляецца найбуйнейшай праграмай па ўмацаванні ўсходняй мяжы, пачынаючы з 1945 года, а таксама “стратэгічнай аперацыяй у імя бяспекі Польшчы”, заявіў на прэс-канферэнцыі 27 траўня віцэ-прэм’ер — міністр нацабароны Польшчы Уладзіслаў Касіняк-Камыш.

Паводле яго слоў, якія прыводзіць TVN24, праграма “ўзгадняецца з планамі НАТО па стрымліванні і абароне”, і Еўрасаюз “павінен узяць фінансавы ўдзел у пабудове бяспекі”. 

Задача праграмы, заявіў чыноўнік, заключаецца ў “перашкодзе перамяшчэнню войскаў праціўніка, аблягчэнні перамяшчэння ўласных войскаў, абароне насельніцтва і гарантаванні максімальнай бяспекі польскіх Узброеных сіл”.

Для яе паспяховага выканання, падкрэсліў Касіняк-Камыш, неабходны шматгадовы інфраструктурны план па стварэнні “ўмацаванняў, розных тыпаў загарод, а таксама самых сучасных сістэм маніторынгу паветранай прасторы па кожным параметры, на любой вышыні”.

У гэтым кантэксце міністр згадаў выведвальную сістэму “Барбара” — чатыры аэрастаты коштам каля 1 млрд долараў і спадарожнікавы складнік, а таксама найноўшыя беспілотныя і супрацьдронавыя сістэмы.

Звярнуўшы ўвагу на ціск мігрантаў, які расце, кіраўнік Мінабароны заявіў, што бар’ер на мяжы з Беларуссю будзе ўмацаваны. “Гэта асобая ад праграмы “Шчыт Усход” мера. “Шчыт Усход” павінен быць мерай вайсковага характару, але абедзве яны павінны дапаўняць адна адну”, — патлумачыў чыноўнік.

У сваю чаргу, намеснік міністра нацыянальнай абароны Польшчы Цэзары Томчык паведаміў, што праектам прадугледжана гарантаванне бяспекі каля 700 км мяжы, у тым ліку 400 км мяжы з Беларуссю. Завяршыць гэты праект, паводле яго слоў, ваеннае ведамства плануе да 2028 года.

У бліжэйшыя тыдні, сказаў Томчык, у Сейме будзе прадстаўлены законапраект “аб інвестыцыях, што маюць асаблівае значэнне для дзяржаўнай бяспекі”, якія “тычацца не толькі вайсковых часцей і аэрапортаў, але і пытанняў, звязаных з мяжой” Польшчы.

Першыя інвестыцыі ў праграму “Шчыт Усход”, дадаў намеснік міністра нацабароны, чакаюцца ў першым квартале 2025 года.

Галоўная мэта гэтай праграмы, паводле слоў начальніка Генеральнага штаба Войска Польскага Веслава Кукулы, заключаецца ў тым, каб “стрымаць праціўніка і не даць яму пачаць вайну, адгаварыць ад яе”.

“Тым не менш, калі вайна ўсё ж адбудзецца, наша мэта з тактычнага пункту гледжання — выйграць прыгранічную бітву, — падкрэсліў военачальнік. — Для гэтага неабходна забяспечыць контрмабільнасць, то бок у першую чаргу спыніць праціўніка <…> ці, магчыма, накіраваць яго рух такім чынам, каб ён заходзіў у <…> месцы, дзе мы будзем метадычна яго знішчаць”.

Для гэтага, паводле яго слоў, трэба ў тым ліку выкарыстаць “простыя рашэнні” — супрацьтанкавыя равы, жалезабетонныя вожыкі, маскаванне для падрыву маставых збудаванняў, займацца “асушваннем дарог, паглыбленнем дрэнажных канаў і адаптацыяй прыродных умоў мясцовасці”.

18 траўня ў Кракаве прэм’ер-міністр Дональд Туск паведаміў, што ўрад Польшчы выдзяляе 10 млрд злотых (2,54 млрд долараў) у рамках новай праграмы “Шчыт Усход” на ўмацаванне мяжы з Беларуссю і Расіяй. “Мы ўжо пачалі працу, каб польская мяжа была бяспечнай у мірны час і непраходнай для ворага — у ваенны”, — заявіў тады кіраўнік урада.