Траціна палякаў згодныя з прыёмам бежанцаў толькі з Беларусі і Украіны — сацдаследаванне

20 чэрвеня, Позірк. Прыём Польшчай бежанцаў падтрымлівае 49% жыхароў краіны, 35% — з умовай, што гэта павінны быць грамадзяне суседніх краін, такіх як Украіна і Беларусь, сведчаць вынікі апытання, праведзенага службай Opinia24 для Gazeta Wyborcza.

Расія, якая таксама мяжуе з Польшчай, у публікацыі не згадваецца.

14% рэспандэнтаў згодныя з прыёмам бежанцаў з іншых дзяржаў, 2% супраць прыёму, 9% не маюць меркавання па гэтым пытанні.

Паводле даных даследавання, найбольш адкрытымі да бежанцаў з’яўляюцца жыхары буйных гарадоў (32% падтрымкі для грамадзян усіх краін), найменш адкрытыя — тыя, хто пражывае ў гарадах з насельніцтвам да 20 тыс. чалавек (8%) і сельскай мясцовасці (10%).

59% апытаных падтрымліваюць прымяненне загараджальных захадаў (так званых “пушбэкаў”, калі мігрантаў выдвараюць з тэрыторыі краіны) на польска-беларускай мяжы.

80% не супраць, каб уцекачы працавалі ў сферы гандлю, паслуг, медыцыны. 58% апытаных не хочуць бачыць такіх замежнікаў сярод палітыкаў.

У якасці суседзяў бежанцаў гатовыя прыняць 75% удзельнікаў даследавання, у якасці зяця — 64%.

Апытанне праводзілася 4–5 чэрвеня метадам камп’ютэрнага і тэлефоннага інтэрв’ю, удзел прыняў 1.001 чалавек.

3.085 спробаў нелегальнага перасячэння мяжы мігрантамі з боку Беларусі спынілі суседнія краіны Еўрапейскага саюзу з пачатку чэрвеня, сведчыць праведзены “Позіркам” 19 чэрвеня аналіз звестак памежных ведамстваў.

Польшча папярэдзіла 2.762 спробы.

Міграцыйны крызіс на мяжы Беларусі і ЕС працягваецца з вясны 2021 года.

Пасля падзей 2020 года Польшча самай папулярнай краінай для беларускіх палітычных эмігрантаў.

Асобныя польскія палітыкі перыядычна прапануюць прымаць мігрантаў з беларуска-польскай мяжы і разглядаць кожны выпадак іх легалізацыі асобна. Улады краіны называюць міграцыйны крызіс “гібрыднай атакай”, якую для дэстабілізацыі сітуацыі арганізавалі рэжымы Аляксандра Лукашэнкі і Уладзіміра Пуціна.

19 чэрвеня ўрад Польшчы дазволіў памежнікам і вайскоўцам, якія патрулююць мяжу, выкарыстоўваць зброю ў крытычных сітуацыях.