Лукашэнка прапанаваў народу ЗША ацаніць дасягненні Беларусі

4 ліпеня, Позірк. “Зазірнуць за гарызонт і скласці сваё асабістае ўражанне пра Беларусь, ацаніць яе дасягненні”, “нягледзячы на палітычныя стэрэатыпы”, прапанаваў 4 ліпеня Аляксандр Лукашэнка народу Злучаных Штатаў Амерыкі ў віншаванні з Днём незалежнасці.

“Упэўнены, шмат хто будзе прыемна здзіўлены і захоча бліжэй пазнаёміцца з нашай краінай”, — лічыць Лукашэнка, якога цытуе яго прэс-служба.

Ён пажадаў народу ЗША “бясхмарнага неба і мудрасці мірнага суіснавання з усімі людзьмі добрай волі”.

“Сардэчна запрашаем у Беларусь!” — гаворыцца ў віншаванні.

Лукашэнка таксама заявіў: “Мы цэнім намаганні простых амерыканцаў, якія па-чалавечы, ад душы дапамагалі нам у барацьбе з нацызмам, пасляваенным аднаўленні краіны, пераадоленні наступстваў аварыі ва ўкраінскім Чарнобылі”.

Беларусь, сцвярджае аўтар паслання, заўсёды зыходзіла з “важнасці канструктыўных кантактаў са Злучанымі Штатамі Амерыкі, а перыяд гісторыі, калі такія кантакты пераважалі, дэманстраваў іх бясспрэчную карысць для дзвюх дзяржаў”.

2 ліпеня на ўрачыстым сходзе ў гонар Дня незалежнасці Беларусі Лукашэнка заявіў, што беларускія ўлады “па-ранейшаму гатовыя пачаць канструктыўны дыялог з Захадам”.

З 2006 года Лукашэнка сярод іншых асоб знаходзіцца пад персанальнымі амерыканскімі санкцыямі.

12 чэрвеня ЗША ўвялі новыя санкцыі супраць кампаній і фізічных асоб, якія аказваюць падтрымку Расеі ў агрэсіі супраць Украіны. У спіс уключаны пяць беларускіх прадпрыемстваў і іх кіраўнікі.

Прэзідэнт ЗША Джо Байдэн падоўжыў на чарговы год, пачынаючы з 16 чэрвеня, дзеянне нацыянальнага рэжыму надзвычайнай сітуацыі (НС) у дачыненні да Беларусі. У паведамленні адзначаецца, што “дзеянні і палітыка некаторых членаў урада Беларусі і іншых асоб, а таксама згубная дзейнасць і шматгадовыя злоўжыванні беларускага рэжыму працягваюць прадстаўляць незвычайную і надзвычайную пагрозу для нацыянальнай бяспекі і знешняй палітыкі Злучаных Штатаў”.

Прэзідэнт Джордж Буш-малодшы ўвёў рэжым НС у дачыненні да Беларусі пасля асуджэння экс-кандыдата ў прэзідэнты на выбарах 2006 года Аляксандра Казуліна (быў прыгавораны да 5,5 года зняволення, але выйшаў на волю ў жніўні 2008-га).

Замест афіцыйнага Мінска ЗША падтрымліваюць дыялог з дэмакратычнымі сіламі Беларусі.