Шэраг банкаў Беларусі паведаміў пра чарговыя новаўвядзенні

5 ліпеня, Позірк. Шэраг банкаў, якія працуюць у Беларусі, паведаміў пра чарговыя новаўвядзенні ў абслугоўванні кліентаў. “Позірк” адсачыў змены па публікацыях на сайтах крэдытна-фінансавых арганізацый.

“Белгазпрамбанк” і “БНБ Банк” увялі аднолькавыя сутачныя ліміты на выдачу наяўных грошай па сваіх картах па-за межамі Беларусі. Абмежаванне для карт Visa Classic, Mastercard Standard, Visa Cashalot, Visa Gold, Mastercard Gold, Mastercard World — 300 долараў, Visa Platinum — 500 долараў, Visa Infinite, Visa Infinite Optima, Mastercard Black Edtion, Mastercard World Elite — 1.000 долараў.

Банк “ВТБ (Беларусь)” часова перастаў адкрываць доларавыя безадзыўныя ўклады на тэрмін больш за 549 дзён — з дапамогай анлайн-сэрвісаў, а таксама адзыўныя ўклады ў беларускіх рублях ад 3 гадоў — у аддзяленнях. Кліентам банка даступныя безадзыўныя ўклады на тэрмін да 1.900 дзён у залежнасці ад валюты.

“МТБанк” паведаміў, што 8 ліпеня спіс краін, даступных для транзакцый з выкарыстаннем сэрвісу пераводаў грашовых сродкаў і мабільнага дадатку Moby, папоўніцца Турцыяй і Ямайкай.

“Парытэтбанк” прапанаваў юрыдычным асобам і індывідуальным прадпрымальнікам паслугі па пераводзе сродкаў у Лаос і Тайланд — у кітайскіх юанях, тайскіх батах і лаоскіх кіпах. Адпаведныя анлайн-пераводы можна ажыццяўляць праз мабільны дадатак eParitet і інтэрнэт-банкінг.

У “Сбер Банку” ўводзіцца новае правіла абыходжання з уласнымі карткамі. З 1 жніўня карты, “вынятыя або забытыя ў прыладзе самаабслугоўвання, пунктах выдачы наяўных грашовых сродкаў, арганізацыях гандлю”, падлягаюць знішчэнню.

Новыя бізнес-кліенты “Тэхнабанка”, якія адкрываюць бягучыя (разліковыя) рахункі, атрымалі магчымасць на працягу 6 месяцаў рабіць пераводы ў Польшчу ў еўра і польскіх злотых па фіксаваным тарыфе — 30 еўра за плацёж незалежна ад сумы транзакцыі (да 10 плацяжоў у залежнасці ад выбранага пакета разлікова-касавага абслугоўвання).

На 1 чэрвеня 2024 года ў Беларусі зарэгістравана 22 банкі (адзін з іх — “Дэльта Банк” — знаходзіцца ў стадыі банкруцтва).

Іх прыбытак з пачатку года, паводле праведзенага “Позіркам” аналізу даных Нацыянальнага банка, паменшыўся на 1 млрд 542,4 млн рублёў (-52,5%) і на 1 чэрвеня склала 1 млрд 397,1 млн рублёў.

Пры гэтым у траўні прыбытак банкаў павялічыўся на 277,1 млн (+24,7%).

На 1 чэрвеня 2023 года гэты паказчык быў роўны 1 млрд 66 млн рублёў (прырост год да года — 31,1%).

Нарматыўны капітал банкаў за пяць месяцаў стаў большым на 5% (з 19 млрд 961,4 млн да 20 млрд 955,5 млн), а яго дастатковасць — на 0,3 працэнтнага пункта (з 19,9% да 20,2%).