Кіраўнік МЗС Беларусі Рыжанкоў наведае Кітай 6–9 ліпеня

5 ліпеня, Позірк. Міністр замежных спраў Беларусі Максім Рыжанкоў 6–9 ліпеня здзейсніць афіцыйны візіт у КНР на запрашэнне свайго кітайскага калегі Ван І, паведаміла на брыфінгу 5 ліпеня прэс-сакратар МЗС Кітая Мао Нінг.

Дэталі візіту яна не прывяла.

На просьбу абазначыць пазіцыю КНР адносна далучэння Беларусі да Шанхайскай арганізацыі супрацоўніцтва (ШАС) у якасці паўнапраўнага члена, прадстаўніца кітайскага знешнепалітычнага ведамства заявіла, што Пекін спадзяецца на “актыўны, усебаковы і глыбокі ўдзел” Мінска ў працы ШАС.

“Цяпер усё больш краін спадзяюцца ўмацаваць супрацу з ШАС, атрымаць ці падвысіць свой прававы статус у ШАС. Кітай запрашае ўсё больш краін, якія прызнаюць “Шанхайскі дух” (збор прынцыпаў ШАС. — “Позірк”.), мэты і прынцыпы арганізацыі, далучыцца да сям’і ШАС, разам працаваць над стварэннем яшчэ больш з’яднанай супольнасці з агульнай будучыняй, сумесна адстойваць міжнародную справядлівасць і правасуддзе, садзейнічаць міру і стабільнасці ва ўсім свеце, рабіць унёсак у глабальны росквіт і развіццё”, — заявіла Мао Нінг.

Аляксандр Лукашэнка прызначыў першага намесніка кіраўніка сваёй адміністрацыі Рыжанкова міністрам замежных спраў 27 чэрвеня. Ён запатрабаваў ад чыноўніка “страсянуць” і “прывесці ў прытомнасць” знешнепалітычнае ведамства.

Незадоўга да гэтага, 22–26 чэрвеня, Пекін наведваў прэзідэнт Польшчы Анджэй Дуда. На перамовах 24 чэрвеня ён сярод іншага давёў да старшыні КНР Сі Цзіньпіна, які ўплыў чыніць міграцыйны крызіс на беларуска-польскай мяжы на пастаўку кітайскіх тавараў у ЕС. Пазней Кітай заявіў, што разлічвае на ўзаемапаважлівае стаўленне Мінска і Варшавы і вырашэнне праблемы на мяжы “шляхам кансультацый”.